قازاقستاندىق سۋرەتشى اسەم سۇلەيمەنوۆا لوندوندا وتكەن Golden Time Talant حالىقارالىق بايقاۋىندا گران-پري يەلەندى. كونكۋرسقا الەمنىڭ تۇكپىر-تۇكپىرىنەن بارلىعى 100-دەن استام قاتىسۋشى كەلدى، ونىڭ ىشىندە 30-عا جۋىعى - سۋرەتشىلەر، دەپ حابارلايدى aqshamnews.kz.
اسەم سۇلەيمەنوۆا كورمەگە ۇلتتىق ناقىش پەن زاماناۋي ەلەمەنتتەرى ۇيلەسكەن «قازاق قىزى» سۋرەتىن ۇسىندى. تالانتتى سۋرەتشىنىڭ تۋىندىلارىندا كوبىندە ەتنيكالىق كومپوزيسيا كەزدەسەدى.
«مەن وتە قۋانىشتىمىن. بايقاۋدا ءتۇرلى تالانتتار بولدى. ءبىراز جاقسى سۋرەتشىلەرگە قاتىسقانى ءۇشىن العىس ءبىلدىردى. ال مەن گران-پري جەڭىپ الدىم. ازىرگە الداعى ۋاقىتقا ناقتى جوسپار جوق. دەگەنمەن ەۋروپا ەلدەرى، سونداي-اق اقش سياقتى حالىقارالىق دەڭگەيدەگى سايىستارعا تاعى شىققىم كەلەدى»، - دەپ اسەم ءوز اسەرىمەن ءبولىستى.
اسەم سۇلەيمەنوۆا Golden Time Talant بايقاۋىنىڭ «سۋرەت» نوميناسياسىندا ونلاين تارتىبىندە جەڭىسكە جەتىپ، لوندونعا كورمەگە ارنايى شاقىرىلعان. بىلتىرعى جىلى جازدا ول اتالمىش كونكۋرسقا «انا مەن بالا» اتتى تۋىندىسىن جىبەرگەن بولاتىن. دوداعا 190 تۋىندىمەن 30-دان استام ەل قاتىسقان ەدى.
لوندونعا ساپارىن Choco Holding كومپانياسىنىڭ باسشىسى راميل مۋحورياپوۆ قولدادى. قازاقستاندىق IT-كومپانيا اسەم سۇلەيمەنوۆانىڭ بىرنەشە سۋرەتىن ساتىپ الىپ، وعان قوسا قارجىلاي كومەك كورسەتتى.
Golden Time Talent – جاسوسپىرىمدەردەن باستاپ تاجىريبەلى ماماندارعا دەيىنگى ادامدارعا ءوز تالانتىن كورسەتۋ مۇمكىندىگىن بەرەتىن حالىقارالىق جوبا.