نىسانا كوزدەۋدەن ارالاس كوماندالىق سىندا قازاقستان كومانداسى پاريج وليمپياداسىندا قولا مەدال جەڭىپ الدى. بۇل ەل ءۇشىن ۇلكەن جەتىستىك بولدى، جانە ەلىمىزگە ەڭ العاشقى مەدالدى الەكساندرا لە مەن يسلام ساتپايەۆ سىيلادى.
ولگا دوۆگۋن ءوزىنىڭ قۋانىشىن جاسىرماي، سپورتشىلاردىڭ مەدال الاتىنىنا سەنگەنىن ايتتى. ول ەكى سپورتشىنىڭ دا الەمدىك دەڭگەيدە جۇلدەگە تالاسا الاتىن قابىلەتتەرىن كورىپ جۇرگەنىن، ازيا چەمپيوناتى مەن الەم كۋبوگى كەزەڭدەرىندە ەكەۋىنىڭ دە جاقسى ناتيجە كورسەتكەنىن اتاپ ءوتتى. دەگەنمەن، بۇعان دەيىن ساتتىلىك جەتىسپەي كەلسە، بۇل جولى ەڭ ۇلكەن جارىس – وليمپيادا ويىندارىندا قولا مەدالعا قول جەتكىزگەندەرىن ەرەكشە اتاپ ءوتتى.
ىرىكتەۋ كەزەڭىندە ءار كومانداعا 30 رەت اتۋ مۇمكىندىگى بەرىلىپ، العاشقى ءتورت كوماندا فينالعا وتەدى. ءبىزدىڭ سپورتشىلار ءۇشىنشى ورىنمەن ءوتتى جانە قولا مەدال جەڭىپ الدى. بۇل قازاقستان ءۇشىن ەرەكشە جەتىستىك، ويتكەنى 1996 جىلعى اتلانتا وليمپياداسىنان بەرى نىسانا كوزدەۋدەن مەدال بولماعان.
"نەگىزى، نىسانا كوزدەۋدەن وليمپيادا ويىندارىندا ەڭ ءبىرىنشى جۇلدە ويناتىلادى. تەك باعدارلاما اۋىستى دەمەسەڭىز، ۇنەمى وليمپيادادا ءبىرىنشى مەدالدى مەرگەندەر ساراپقا سالادى. ەڭ العاشقى جارىس كۇنىندە قازاقستانعا ەڭ العاشقى مەدالدى سىيلاۋ – كەرەمەت سەزىم! بۇل ۇلكەن باقىت،" - دەدى دوۆگۋن.
قازاقستاندىق سپورتشىلار 10 مەترگە ۆينتوۆكامەن نىسانا كوزدەۋدەن ۇزدىك ۇشتىككە ەندى جانە بۇل جەتىستىك ەل سپورتىنىڭ تاريحىندا ماڭىزدى ورىن الادى.