ولار الاپات ءزىلزالادان سوڭ تۇركيادا 10 كۇن بويى ىزدەۋ-قۇتقارۋ شارالارىن جۇرگىزدى.
الدىمەن نۇرداعى قالاسىنداعى 35 قۇتقارۋشى وزدەرىنە تاپسىرىلعان ۋچاسكەدە بارلىق جۇمىستاردى ءبىتىردى، دەپ حابارلايدى Almaty-akshamy.kz.
ءۇش ادامدى ۇيىندىلەر استىنان الىپ شىقتى. ودان كەيىن گازيانتەپ قالاسىنداعى قۇتقارۋشى توپ تا جۇمىسىن اياقتاپ، تەحنيكالارى مەن قۇرال-سايماندارىن جيىستىردى. ون كۇن ىشىندە ءبىزدىڭ قۇتقارۋشىلار 8 ادامدى ءۇيىندى استىنان الىپ شىقتى. گازيانتەپ قالاسىندا قۇرىلعان جىلجىمالى اۋرۋحانا دا جينالدى. دارىگەرلەرىمىز وسى كۇندەرى 140 جەرگىلىكتى تۇرعىنعا مەديسينالىق كومەك كورسەتتى. ونىڭ ون جەتىسى - بالا. ەرتەڭ قۇتقارۋشىلارىمىزدىڭ العاشقى لەگى ەلگە ورالا باستايدى.
«بەرىلگەن تاپسىرمالاردى ورىنداپ، جۇمىستاردى اياقتاپ جاتىرمىز. قولىمىزدان كەلگەنشە كۇشىمىزدىڭ ءبارىن سالدىق. كۇن-تۇن دەمەي كەزەكشىلىككە ءبولىنىپ، قۇتقارۋشىلارىمىز جۇمىس ىستەپ جاتىر. وتە ءقاۋىپتى جۇمىس ەكەنىن وزدەرىڭىز كورىپ تۇرسىزدار. باسقا مەملەكەتتەردىڭ، وسى تۇرىك ەلىنىڭ قۇتقارۋشىلارىنىڭ دا جاراقات العانىن كورىپ جاتىرسىزدار. ءتارتىپتىڭ ارقاسىندا وسى جۇمىستى امان-ەسەن اياقتاپ جاتىرمىز»، - دەدى ق ر توتەنشە جاعدايلار ءمينيسترىنىڭ ءبىرىنشى ورىنباسارى يبراحيم كۇلشىمبايەۆ.