بۇل بالالارىمىزدىڭ دايىندىق دەڭگەيىن كورسەتەدى.
وقۋ-اعارتۋ ءمينيسترى اسحات ايماعامبەتوۆ بيىلعى حالىقارالىق ءپان وليمپيادالارىنىڭ ارالىق قورىتىندىسىن جاريالادى، دەپ حابارلايدى Almaty-akshamy.kz.
«بۇگىنگى كۇنگە دەيىن وقۋشىلارىمىز 5 پاننەن 21 مەدال جەڭىپ الدى. ۇلتتىق قۇراما قورجىنىندا 3 التىن، 13 كۇمىس جانە 5 قولا مەدال بار. ياعني 23 قاتىسۋشىنىڭ 21ء-ى جۇلدەلى ورىنعا يە بولدى. بۇل جەردە ەڭ بەدەلدى حالىقارالىق وليمپيادالار تۋرالى ايتىپ وتىرمىز. بيىل تۇڭعىش رەت پرەزيدەنتتىڭ قولداۋىنىڭ ارقاسىندا وقۋشىلارىمىز 4،5 ملن تەڭگەگە دەيىن قوماقتى اقشالاي سىياقى الىپ، ۇبت تاپسىرماي-اق جوو-عا گرانتقا ءتۇسۋ مۇمكىندىگىنە يە بولادى. ماتەماتيكادان حالىقارالىق وليمپيادادا (IMO) قازاقستان قۇراماسى 3 كۇمىس جانە 3 قولا جۇلدەنى جەڭىپ الدى. كوماندامىز 174 ۇپاي جيناپ، ەلىمىزدىڭ وليمپياداعا قاتىسۋ تاريحىنداعى جاڭا رەكوردىن ورناتتى. كوماندالىق ەسەپتە ەلىمىز 17-ورىندا، ال بۇل - 12 جىلداعى ۇزدىك كورسەتكىش. فيزيكادان حالىقارالىق وليمپيادادا وقۋشىلارىمىز 1 التىن، 4 كۇمىس مەدال يەلەندى. بۇل - سوڭعى 8 جىلداعى ەڭ جاقسى كورسەتكىش. بىلتىر كوماندانىڭ قورجىنىنا 5 كۇمىس تۇسكەن بولاتىن. گەوگرافيادان حالىقارالىق وليمپيادادا وقۋشىلارىمىز ەكىنشى جىل قاتارىنان التىن مەدال جەڭىپ الدى. بيىل دا 1 قولا مەدالعا يە بولدىق»، - دەپ جازادى ءمينيسترى Facebook پاراقشاسىندا.
ءمينيستردىڭ ايتۋىنشا، بيولوگيادان حالىقارالىق وليمپيادانىڭ قاتىسۋشىلارى 3 كۇمىس جانە 1 قولا جۇلدە جەڭىپ الىپ، بىلتىرعى ناتيجەسىن جاقسارتقان.
بىلتىر 1 كۇمىس جانە 2 قولا مەدال، سونداي-اق ءبىر قۇرمەت گراموتاسىن العان بولاتىن.
ال زياتكەرلىك سايىسقا قاتىسقان جاس حيميكتەرىمىزدىڭ جۇمىسىن وتە جوعارى باعالاۋعا بولادى. ولار 1 التىن جانە 3 كۇمىس جەڭىپ الدى. ونىڭ ۇستىنە بۇل 2017 جىلدان بەرگى العاشقى «التىن» بولدى.
«سالىستىرمالى تۇردە الساق، بىلتىر كوماندامىز 3 كۇمىس جانە 1 قولا مەدالمەن ماراپاتتالعان بولاتىن. بارلىق باعىتتا وڭ وزگەرىس بار ەكەنىن بايقاۋعا بولادى. بۇل بالالارىمىزدىڭ دايىندىق دەڭگەيىن كورسەتەدى. الداعى ۋاقىتتا ينفورماتيكا مەن لينگۆيستيكادان وليمپيادا وتەدى. وقۋشىلارىمىز ەلىمىزدىڭ نامىسىن ابىرويمەن قورعايتىنىنا سەنىمىم مول. وقۋشىلارىمىزدى جەتكەن جەتىستىكپەن قۇتتىقتايمىن. قولداۋ كورسەتكەن اتا-انالارىنا جانە كاسىبي شەبەرلىگى ءۇشىن ارىپتەستەرىمە دە العىس ايتقىم كەلەدى»، - دەپ تۇيىندەدى ءسوزىن اسحات ايماعامبەتوۆ.