قازاقستاندىق وقۋشىلار فيزيكا پانىنەن حالىقارالىق وليمپيادادان جۇلدەلى ورالدى

قازاقستاندىق وقۋشىلار فيزيكادان حالىقارالىق وليمپيادادا 1 التىن مەن 4 كۇمىس مەدال جەڭىپ الدى.

بۇل تۋرالى وقۋ-اعارتۋ ءمينيسترى اسحات ايماعامبەتوۆ Facebook پاراقشاسىندا جازدى، دەپ حابارلايدى Almaty-akshamy.kz Elorda.info-عا سىلتەمە جاساپ.

«ۇلتتىق قۇرامامىزدىڭ قورجىنى تاعى دا مەدالدارمەن تولىقتى. وقۋشىلارىمىز كەرەمەت ناتيجە كورسەتىپ، فيزيكادان حالىقارالىق وليمپيادادا (IPhO) 1 التىن جانە 4 كۇمىس مەدال جەڭىپ الدى. جارىس سيۋريح قالاسىندا (شۆەيساريا) 10-15 شىلدە ارالىعىندا ءوتتى. ەلىمىزدىڭ نامىسىن 5 وقۋشى قورعادى. ولار 75 ەلدەن كەلگەن 368 جاسوسپىرىممەن سىنعا ءتۇستى. بالالارىمىز وتكەن جىلى 5 كۇمىسكە يە بولعان ەدى. وسىلايشا بيىل وقۋشىلارىمىز بىلتىرعى كورسەتكىشتى جاقسارتا الدى. ۇلتتىق قۇراما قورجىنىنا التىن مەدالدى دانييل شاتوحين، كۇمىس مەدالدى ەرسۇلتان پىتەباي، ۆلاديمير ليم، دىنمۇحاممەد راحىمجانوۆ جانە ريزابەك الپامىس اكەلدى»، - دەلىنگەن ءمينيستردىڭ جازباسىندا.

ايماعامبەتوۆ وقۋشىلاردى ۇلكەن جەتىستىكتەرىمەن قۇتتىقتادى.

«وسىنداي بەدەلدى حالىقارالىق وليمپيادالاردىڭ جەڭىمپازدارى اقشالاي سىياقى الىپ، ۇلتتىق جوعارى وقۋ ورىندارىنا ۇبت تاپسىرماي-اق گرانتقا تۇسە الاتىنىن ەسكە سالا كەتەيىن. سونىمەن قاتار جۇلدەگەرلەردىڭ پەداگوگ-تالىمگەرلەرى دە تولەم الادى»، - دەپ جازدى اسحات ايماعامبەتوۆ.