قازاق ونەرپازدارى «اداي»، «كوروعلى»، «ءالقيسسا» كۇيلەرى مەن ولجاس سۇلەيمەنوۆتىڭ «West» تۋىندىسىن ورىندادى.
ولار «حالىق اسپاپتارى» نوميناسياسى بويىنشا توپ جارىپ، حالىقارالىق قازىلار القاسىنىڭ جوعارى باعاسىنا يە بولدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
مادەنيەت جانە سپورت مينيسترلىگىنىڭ قولداۋىمەن «روزا باعلانوۆا اتىنداعى «قازاقكونسەرت» مەملەكەتتىك كونسەرتتىك ۇيىمىنىڭ سوليستەرى، «دارىن» مەملەكەتتىك جاستار سىيلىعىنىڭ لاۋرەاتتارى – «T&Y» دومبىراشىلار دۋەتىنىڭ مۇشەلەرى تەمىرلان ولجاباي مەن ەرنات ناۋرىز «Open Italy» اسپاپتى ورىنداۋشىلاردىڭ حالىقارالىق مۋزىكا بايقاۋىندا باس جۇلدەنى جەڭىپ الدى
«Open Italy» اسپاپتى ورىنداۋشىلاردىڭ حالىقارالىق مۋزىكا بايقاۋى جىل سايىن يتاليا مەملەكەتىنىڭ پەزارو قالاسىندا وتەدى. شاراعا الەمنىڭ تۇكپىر-تۇكپىرىنەن اسپاپشىلار شاقىرىلعان. بايقاۋعا 24 ەلدەن ۇمىتكەرلەر قاتىستى.
ءىس-شارا اياقتالىپ، قورىتىندىلار جاريالانعاننان كەيىن مىندەتتى تۇردە قازىلار القاسىنىڭ وكىلدەرىمەن دوڭگەلەك ۇستەل وتكىزىلەدى. ايتا كەتەيىك، بايقاۋ اياسىندا شەبەرلىك سىنىبى دا قاراستىرىلعان.
بايقاۋدىڭ نەگىزىن قالاۋشىلار – يسپانيانىڭ «Fiestalonia Milenio» فەستيۆال كوميتەتى، «Ad Arte» قاۋىمداستىعى (يتاليا) جانە باس كەڭسەسى لوندوندا ورنالاسقان «Fiestalonia International» دارىندى ورىنداۋشىلاردىڭ پروديۋسەرلىك ورتالىعى.