قازاقستاندىق وندىرۋشىلەر حالىقارالىق ونەركاسىپتىك كورمەگە قاتىسادى

اتالمىش شارا 4-7 شىلدە كۇندەرى ەكاتەرينبۋرگ قالاسىندا وتەدى.

كەلەسى ايدىڭ باسىندا قازاقستاندىق وندىرۋشىلەر يننوپروم-2022 حالىقارالىق ونەركاسىپتىك كورمەسىنە قاتىسادى. بۇل شارا قازاقستاندىق كومپانيالار ءۇشىن كوپتەگەن  مۇمكىندىك بەرەدى، دەپ حابارلايدى Almaty-akshamy.kz.

«2022 جىلعى 4-7 شىلدەدە ەكاتەرينبۋرگ قالاسىندا (رف) يننوپروم «ونەركاسىپتىك اۋىسۋ: سىن-قاتەرلەردەن جاڭا مۇمكىندىكتەرگە» 12 حالىقارالىق ونەركاسىپتىك كورمەسى وتەدى»،- دەلىنگەن يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.

كورمەنىڭ نەگىزگى باعىتتارى: سيفرلىق ءوندىرىس، مەتالل وڭدەۋ، كولىكتىك ماشينا جاساۋ، مەتاللۋرگيا، ەنەرگەتيكاعا ارنالعان تەحنولوگيالار، جاڭا ماتەريالدار، كومپونەنتتەر ءوندىرىسى، تاۋ-كەن ونەركاسىبى.

كومپانيالار تاۋ-كەن مەتاللۋرگيا كەشەنى، ماشينا جاساۋ، حيميا جانە فارماسيەۆتيكا ونەركاسىبى، قۇرىلىس يندۋسترياسى، جەڭىل ونەركاسىپ، سيفرلىق يندۋستريا، جاسىل ەنەرگيا، اەروعارىش جانە قورعانىس ونەركاسىبى ءۇشىن ونىمدەر مەن شەشىمدەردى ۇسىنادى.

يننوپروم-2022 ىسكەرلىك باعدارلاماسى اياسىندا كومپانيالار مەن وڭىرلەردىڭ كونفەرەنسيالارى مەن سەمينارلارى جوسپارلانعان.

6-7 شىلدەدە يننوپرومدا قۇرامداس بولىكتەردى وندىرۋشىلەردىڭ فورۋمى وتەدى. بۇل شارا اياسىندا قۇرامداس بولىكتەردى وندىرۋشىلەر رەسەي فەدەراسياسىنىڭ ەڭ ءىرى ونەركاسىپتىك كومپانيالارىنا ءوز ونىمدەرى مەن تەحنولوگيالارىن ۇسىنا الادى.

يننوپروم-قازاقستاندىق كومپانيالار ءۇشىن ءوزىن تانىتۋعا، كەلىسىمشارتتار جاساۋعا جانە جاڭا سەرىكتەستىك بايلانىستار ورناتۋعا تاماشا مۇمكىندىك.

قازاقستان بيىل يننوپروم-2022 كورمەسىنىڭ رەسمي سەرىكتەس ەلى بولىپ تابىلادى. وسىعان بايلانىستى قازاقستاندىقتار قۇرامداس بولىكتەردى وندىرۋشىلەردىڭ فورۋمىنا تەگىن قاتىسا الادى.