ءار ەلدىڭ سىرتقى قارىم-قاتىناسىندا الدىمەن ەكونوميكالىق سالا باسىم تۇراتىنى بەلگىلى.
ال قازاقستان مەن گەرمانيا اراسىنداعى بايلانىس ادامي كاپيتالمەن قۇندى. بۇگىندە بۇل ەلدە جارتى ميلليونعا جۋىق قازاقستاندىق نەمىس ءومىر سۇرەدى، دەپ حابارلايدى Almaty-akshamy.kz 24.kz-كە سىلتەمە جاساپ.
تاريحي وتانىنا قونىس اۋدارعانىنا قاراماستان، ءبارى ءالى كۇنگە دەيىن قازاق جەرىن ساعىناتىندارىن جاسىرمايدى. الەكسەي شراينەر قازاقستاندا تۋىپ وسكەن. جاستايىنان اتقا جايداق ءمىنىپ، اسىقتاي شيراق بوپ ەرجەتەدى. ءبىراق 1999 جىلى ونىڭ وتباسى تاريحي وتانىنا ورالۋعا بەل بۋادى. سودان بەرى قانشا ۋاقىت وتسە دە، كىندىك قانى تامعان قازاقستان ءبىر ساتكە ەسىنەن كەتپەگەن. بالالىق شاعى وتكەن كوكشەتاۋدى قاتتى ساعىنعانىن ايتادى.
- مەن 21 جاسىما دەيىن قازاقستاندا ءومىر ءسۇردىم. كوكشەتاۋدا ءبىلىم الدىم. ءالى كۇنگە دەيىن كەڭ دالانىڭ ءيىسى ەسىمنەن كەتپەيدى. ارادا قانشا ۋاقىت وتسە دە، كوز الدىما العاشقى ءۇيىمىز ەلەستەيدى. ءتىپتى تۇسىمە دە كىرەدى. بالا كەزدە اكە-شەشەم قارقارالىعا ءجيى جىبەرەتىن. سول كەزدە كوكەم العاش رەت اتقا مىنگىزگەن ەدى، - دەيدى Ars Pro Dono گالەرەياسىنىڭ نەگىزىن قۇرۋشى الەكسەي شراينەر.
بۇگىندە الەكسەي تابىستى كاسىپكەر. گالەرەيانىڭ يەسى. وسىدان 20 جىل بۇرىن جيعان-تەرگەنىنىڭ ءبارىن سوعان جۇمساپ، ەندى جەمىسىن كورىپ وتىر. مۇندا گرۋزيا، ۋكراينا، پولشا مەن قازاقستاننان شىققان قىلقالام شەبەرلەرىنىڭ تۋىندىلارى ۇسىنىلعان. الەكسەيدىڭ ايتۋىنشا، وسىلايشا ول بەرلين حالقىن قازاق ونەرىمەن تانىستىرۋعا تىرىسادى.
الەكسەي شراينەر، Ars Pro Dono گالەرەياسىنىڭ نەگىزىن قۇرۋشى: - بەرلين ميلليونداعان تۇرعىنى بار ءىرى مەگاپوليس قوي. سايكەسىنشە ءبىزدىڭ گالەرەياعا كەلۋشىلەر سانى دا كوپ. ءبارى قازاق سۋرەتشىلەرىنىڭ شىعارمالارىن كورىپ تامسانادى.
جىلدار وتسە دە، گەرمانياداعى قازاقستاندىق نەمىستەر ءالى كۇنگە دەيىن ءبىزدىڭ ءداستۇردى بەرىك ۇستانادى. تاعامدارىمىزدى ازىرلەپ، ءتىلىمىزدى قۇرمەتتەيدى.
ناتاليا شراينەر، الەكسەيدىڭ جارى: - سۇيىكتى تاعامىمىز مانتى مەن پالاۋ. نەمەلەرىمىز دە، بالالارىمىزدا وتە جاقسى كورەدى. ونى قالاي ازىرلەۋ كەرەگىن كەزىندە جۇبايىمنىڭ ءوزى ۇيرەتكەن بولاتىن.