قازاقستاندىق مۋزىكانتتار يسپانيادا وتكەن كونكۋرستا جەڭىسكە جەتتى

بايقاۋعا جۇزدەن اسا مۋزىكانت قاتىستى.

جامبىل اتىنداعى قازاق مەملەكەتتىك فيلارمونياسىنىڭ اعاشتى-ۇرمەلى اسپاپتار كۆينتەتى يسپانيادا وتكەن «Open Spain» («اشىق يسپانيا») حالىقارالىق بايقاۋىنان ءبىرىنشى ورىندى يەلەندى، دەپ حابارلايدى Almaty-akshamy.kz Turkystan.kz سىلتەمە جاساپ. 

يسپانيانىڭ للورەت دە مار قالاسىندا وتكەن بايقاۋعا الەمنىڭ 30-عا جۋىق ەلىنەن جۇزدەن اسا مۋزىكانت قاتىستى. جىلدا ءداستۇرلى تۇردە وتكىزىلىپ، الەمنىڭ تۇكپىر تۇكپىرىنەن كەلگەن تالانتتاردىڭ باسىن قوساتىن «Open Spain» – اسپاپتىق  ورىنداۋشىلاردىڭ اشىق حالىقارالىق بايقاۋى.

اتالمىش بايقاۋعا يسپانيانىڭ Fiestalonia Milenio فەستيۆال كوميتەتى، سانت روما شىركەۋى، جيرونا كونسەرۆاتورياسى، للورەت دە مار قالاسىنىڭ مەرياسى، باس كەڭسەسى لوندوندا ورنالاسقان Fiestalonia International دارىندى ورىنداۋشىلاردىڭ پروديۋسەرلىك ورتالىعى قولداۋ كورسەتەدى.

ايتا كەتۋ كەرەك، اعاشتى-ۇرمەلى اسپاپتار كۆينتەتى قازاقستاننىڭ ەڭبەك سىڭىرگەن قايراتكەرى، حالىقارالىق كونكۋرستاردىڭ لاۋرەاتى، ۆ.ا. موسارت اتىنداعى ەۋروپالىق مۋزىكا اكادەمياسىنىڭ تۇلەگى، كلارنەتشى – جانات  ەرمانوۆتىڭ باسشىلىعىمەن 1997 جىلى قۇرىلدى.