مادەنيەت جانە اقپارات مينيسترلىگىنىڭ كەڭەيتىلگەن القا وتىرىسىندا پارلامەنت سەناتىنىڭ دەپۋتاتى بيبىگۇل جەكسەنباي ەلىمىزدىڭ مەديا سالاسى ءبىرقاتار جۇيەلى ماسەلەلەرگە تاپ بولىپ وتىرعانىن اتاپ ءوتتى. بۇل تۋرالى Aqshamnews.kz سايتى حابارلايدى.
سيفرلىق ترانسفورماسيا جانە وڭىرلىك باق-تىڭ ارتتا قالۋى
قازاقستاندىق ءداستۇرلى ب ا ق سيفرلىق فورماتقا كوشۋ بارىسىندا قيىندىقتارعا تاپ بولۋدا. اسىرەسە، وڭىرلىك باسىلىمدار تەحنولوگيالىق وزگەرىستەرگە ىلەسە الماي، قارجىلىق جانە كادرلىق ماسەلەلەرگە بايلانىستى دامۋدان كەنجە قالۋدا. اۋديتوريانىڭ ونلاين پلاتفورمالارعا كوشۋى ءداستۇرلى مەديانىڭ ىقپالىن السىرەتىپ وتىر.
مەديا ساۋاتتىلىق جانە جالعان اقپارات ماسەلەسى
حالىق اراسىندا اقپاراتتى سىني تۇرعىدان باعالاۋ دەڭگەيى تومەن، بۇل فەيك اقپاراتتىڭ تارالۋىنا جانە مانيپۋلياسياعا جول اشادى. سونىمەن قاتار، زاڭنامالىق بازانىڭ سيفرلىق پلاتفورمالاردى قامتىماۋى بلوگەرلەر مەن ونلاين مەديالار قىزمەتىن رەتتەۋدە قۇقىقتىق ۆاكۋۋم تۋدىرىپ وتىر.
قارجىلاندىرۋ جانە مەديا نارىقتاعى باسەكە
قازاقستاندىق ب ا ق كوبىنە مەملەكەتتىك تاپسىرىسقا تاۋەلدى، ال تاۋەلسىز باسىلىمدار جارناما مەن وقىرمانداردىڭ قولداۋىنا سۇيەنۋگە ءماجبۇر. جارناما نارىعى شاعىن بولعاندىقتان، وتاندىق مەديالار شەتەلدىك ءىرى پلاتفورمالارمەن (Google، Meta) باسەكەلەسە المايدى. مەملەكەت گرانتتار مەن مەملەكەتتىك تاپسىرىستاردى ءارتاراپتاندىرىپ، جاڭادان قۇرىلعان مەديالاردى قولداۋعا نازار اۋدارۋى كەرەك.
اۋديتوريانىڭ سەنىمسىزدىگى جانە اقپاراتتىڭ ءبىرجاقتىلىعى
قوعام مەملەكەتتىك مەديانىڭ رەسمي اقپاراتتى ءبىرجاقتى جەتكىزەتىنىن سەزىنەدى. ال الەۋمەتتىك جەلىلەردە تارايتىن مالىمەتتەر جىلدام ءارى ءتۇرلى كوزقاراستاردى قامتيتىندىقتان، اۋديتوريانىڭ قىزىعۋشىلىعى ءداستۇرلى باق-قا قاراعاندا تومەندەۋدە. مەملەكەتتىك ب ا ق ءوز كونتەنتىن اشىقتىق، وبەكتيۆتىلىك، فاكچەكينگ قاعيدالارىنا نەگىزدەۋى ءتيىس.
كادر تاپشىلىعى جانە كاسىبي ستاندارتتاردىڭ تومەندەۋى
جۋرناليستيكا سالاسىندا بىلىكتى ماماندار جەتىسپەيدى. اقپاراتتىق رەسۋرستاردا ساپاسىز اۋدارمالار، كاسىبي ەتيكانىڭ بۇزىلۋى ءجيى كەزدەسەدى. جالاقىنىڭ تومەندىگى سالدارىنان تاجىريبەلى جۋرناليستەر باسقا سالالارعا اۋىسىپ كەتۋدە. جۋرناليستيكا فاكۋلتەتتەرىنىڭ ءبىلىم ساپاسىن ارتتىرىپ، مەديا ماماندارىن تۇراقتى وقىتۋ قاجەت.
وڭىرلىك ءباسپاسوزدىڭ تيىمسىزدىگى
وبلىستىق جانە اۋداندىق گازەتتەر اكىمدىك قىزمەتىن دارىپتەۋگە باعىتتالعاندىقتان، حالىقتىڭ شىنايى ماسەلەلەرى كوتەرىلمەيدى. بۇل وقىرماننىڭ قىزىعۋشىلىعىن تومەندەتىپ، اقپاراتتىڭ وزەكتىلىگىن جويادى. مىسالى، اقمولا وبلىسى ارشالى اۋداندىق گازەتىنە 20 ملن تەڭگە بولىنگەنىمەن، تارالىمى نەبارى 1000 دانا. ال اۋداندا 48 مىڭ حالىق بارىن ەسكەرسەك، بۇل قارجىنىڭ ءتيىمسىز جۇمسالعانىن كورسەتەدى.
قازاقستاننىڭ مەديا سالاسى كۇردەلى وزگەرىستەردى قاجەت ەتەدى. سيفرلىق ترانسفورماسيانى جەدەلدەتۋ، مەديا ساۋاتتىلىقتى ارتتىرۋ، قۇقىقتىق بازانى جەتىلدىرۋ جانە ءادىل باسەكە ورناتۋ – وتاندىق مەديانى جاڭا دەڭگەيگە كوتەرۋدىڭ باستى شارتتارى.