2022 جىلدىڭ سوڭىندا 8،8%-عا دەيىن جەتۋى مۇمكىن.
ق ر ۇلتتىق بانكى اقشا-كرەديت ساياساتى اياسىندا 2023 جىلى ينفلياسيا بىرتىندەپ 7،5-9،5%-عا دەيىن باياۋلايدى، دەپ حابارلايدى Almaty-akshamy.kz Inbusiness.kz سىلتەمە جاساپ.
سونداي-اق الەمدەگى ازىق-تۇلىك باعاسى ءوسىمىنىڭ باياۋلاۋى، نەگىزگى ساۋدا ارىپتەس ەلدەردەگى ينفلياسيانىڭ باياۋلاۋى دا ينفلياسيانى تەجەيتىن بولادى. بۇل تۋرالى "2023-2025 جىلدارعا ارنالعان رەسپۋبليكالىق بيۋدجەت تۋرالى" ماسەلە بويىنشا ءماجىلىستىڭ پلەنارلىق وتىرىسىندا ۇلتتىق بانك ءتوراعاسى عالىمجان ءپىرماتوۆ مالىمدەدى.
"حالىقارالىق ۆاليۋتا قورىنىڭ بولجامدارىنا سايكەس، الەمدەگى ينفلياسيا بۇرىن كۇتكەننەن جوعارى دەڭگەيدە ۇزاعىراق قالىپ وتىر جانە ول 2022 جىلدىڭ سوڭىندا 8،8%-عا دەيىن جەتۋى مۇمكىن. ودان كەيىن حالىقارالىق ۆاليۋتا قورى جاھاندىق ينفلياسيا 2023 جىلى 6،5%-عا دەيىن جانە 2024 جىلعا قاراي 4،1%-عا دەيىن باسەڭدەيدى دەپ بولجايدى"، – دەپ مالىمدەدى ۇلتتىق بانك ءتوراعاسى.
سونداي-اق تاۋار يمپورتى جوعارى دەڭگەيدە ساقتالادى دەگەن بولجام بار. بۇعان دەيىن ۇلتتىق بانك قىركۇيەك ايىندا جىلدىق ماندەگى ينفلياسيا 17،7%-عا جەتكەنىن مالىمدەگەن بولاتىن.