الماتىدا 184 مىڭنان استام ادام كاسىبىن دوڭگەلەتىپ وتىر.
بيىل قازاقستاندا جەكەمەنشىك كاسىپكەر رەتىندە تىركەلگەندەر سانى 26 پايىزعا ارتتى، دەپ حابارلايدى Almaty-akshamy.kz Almaty.tv سىلتەمە جاساپ.
جۇمىس ىستەپ تۇرعانداردىڭ باسىم بولىگى الماتىدا ورنالاسقان. ءقازىر مەگاپوليستە 184 مىڭنان استام ادام كاسىبىن دوڭگەلەتىپ وتىر. بۇل وتكەن جىلدىڭ سايكەس مەرزىمىمەن سالىستىرعاندا شامامەن 60 پايىز كوپ. ۇزدىك ۇشتىككە تۇركىستان وبلىسى جانە استانا قالاسى ەندى.
كاسىپكەرلىكتى قولداۋ اياسىندا جۇمىس اۋقىمى كەڭەيدى. الماتىنىڭ يندۋستريالدى ايماعىندا وسىدان 1 جىل بۇرىن اشىلعان ىشكى ەسىكتەر شىعاراتىن سەح ءقازىر تاۋارلارىن قازاقستاننىڭ 16 وڭىرىنە ساتادى. كاسىپورىندا 120 ادام ەكى قولعا ءبىر كۇرەك تاپقان. ەلىمىزدە جاسالعان ەسىكتەر ساپالى ءارى باعاسى نارىقتان 40 پايىز تومەن. كاسىپ يەسى ازات قاليوللا ۇلى ميللياردتاعان قارجىنى سىرتقا قۇيعانشا، وتاندىق كاسىپتى قولداۋ اناعۇرلىم ۇتىمدى ەكەنىن ايتادى. سوندىقتان جاس كاسىپكەرلەردى ءوزىمىزدىڭ ءونىمىمىزدى كوبەيتۋگە شاقىردى.
بۇگىندە «Almaty Business-2025» باعدارلاماسى اياسىندا 23 ميللياردتان استام قارجىعا 404 جوبا قارجىلاندىرىلعان. 3045 جۇمىس ورنى اشىلدى. ال فابريكانىڭ دامۋىنا زور مۇمكىندىك بەرگەن – الماتى قالاسىنىڭ اكىمدىگى. كاسىپكەرلىكتى قولدايتىن باسقارما ولارعا 5 جىل بويى باعاسى وزگەرىسسىز قالاتىنداي ەتىپ، جەردى جالعا بەرگەن. ال الماتى فينانس مەكەمەسى جەڭىلدەتىلگەن نەسيەمەن قامتاسىز ەتكەن.
«قالانىڭ ىشىندە تۇرىپ، بىزگە وسىنداي مۇمكىندىك بەرىپ جاتقان مەملەكەت. مۇندا ەلەكتر جارىعى دا وتكىزلگەن. بارلىق جاعداي جاسالعان. Almaty Finance دەگەن اكىمشىلىككە قاتىستى ۇيىم بار، ارنايى باعدارلامالارى بار. جوسپارى بار، ءوندىرىس اشام دەگەن بالالارعا مۇمكىندىك بار»، – دەدى ىشكى ەسىكتەر فابريكاسىنىڭ ديرەكتورى ازات قاليوللا ۇلى.
ءقازىر قازاقستاندا جاسالعان ونىمگە تاپسىرىس ۇلعايعان. ماسەلەن، الماتىدا سالىنىپ جاتقان ءبىلىم وردالارىنا وسى كومپانيانىڭ ەسىكتەرى ورناتىلىپتى. كاسىپكەردىڭ سوزىنشە، ەگەر تاۋار سىرتتان الىنسا، ايتارلىقتاي قىمباتقا تۇسەتىن ەدى. فابريكا ايىنا تاپسىرىسقا قاراي 10-15 مىڭ ەسىك شىعارادى. ال جىلىنا 120 مىڭنان استام تاۋار وندىرەدى. بولاشاقتا كاسىپورىندى كەڭەيتۋ دە جوسپاردا بار ەكەن.