قازاقستاندىق جاس تەننيسشىلەر ITF جانە Tennis Europe سەرياسى بويىنشا وتكەن تۋرنيرلەردىڭ جەڭىمپازى اتاندى، دەپ حابارلايدى Almaty-akshamy.kz Inform.kz-كە سىلتەمە جاساپ.
قازاقستان تەننيس فەدەراسياسىنان ءمالىم ەتكەندەي، شولپان-اتادا (قىرعىزستان) 18 جاسقا دەيىنگىلەر اراسىندا ءتورتىنشى ساناتتاعى ITF جارىسىندا ەراسىل ەردىلدا ۇزدىك شىقتى.
ەراسىل جەكەلەي سىن فينالىندا يراندىق كاسر ءراحمانيدى ۇتتى. ەسەپ 3:0 بولىپ، قازاقستاندىق تەننيسشى جەڭىپ جاتقان ساتتە راحماني ماچتى جالعاستىرۋدان باس تارتتى.
جۇپتىق سىندا قىزدار اراسىندا ادەمى امانكەلدى قىرعىزستاندىق ۆلاديسلاۆا اندرەيەۆسكايامەن بىرگە فينالدا رەسەيلىكتەر كريستينا بەلكوۆا - كسەنيا كرۋپەنينانى ۇتتى – 6:4، 6:2.
روبەرت كامينسكيي ءوز جانكۇيەرلەرىن قۋانتىپ كەلەدى. ول گەرمانيانىڭ كوبلەنس قالاسىندا 12 جاسقا دەيىنگىلەر اراسىندا ءبىرىنشى ساناتتاعى Tennis Europe دوداسىندا كەزەكتى تيتۋلىن جەڭىپ الدى. روبەرت فينالدا يران ەلىنىڭ جاس جۇلدىزى كيراش ساديجزادەنى تىزە بۇكتىردى – 6:3، 6:2. وسىلايشا، الماتىلىق تۇلەك سوڭعى ەكى اپتادا ەكىنشى جەڭىسىنە قول جەتكىزدى.
كوبلەنستە تاعى ءبىر قازاقستاندىق تۇرسايد داركەن جۇپتىق سىندا فيناليست اتاندى. زارا داركەننىڭ كىشى ءىنىسى يراندىق ك. ساديجزادەمەن بىرگە سوڭعى باسەكەدە گەرمانيالىقتار ليان بينەرت - ماكس گومبەككە ەسە جىبەردى – 3:6، 6:4، 1:10.
چەرنوگوريادا ەكىنشى ساناتتاعى وسىنداي تۋرنيردە 11 جاسار ياسمين دۇيسەمبايەۆا جارتىلاي فينالعا دەيىن جەتىپ، رۋمىنيالىق ياسين ستروەگە جول بەردى – 6:3، 3:6، 8:10.
قازاقستاندىق جاسوسپىرىمدەر، سونداي-اق اقش اشىق چەمپيوناتىنا دايىندىعىن تياناقتاۋ ۇستىندە. بيىل جاسوسپىرىمدەر اراسىندا اقش اشىق چەمپيوناتىنىڭ ىرىكتەۋ سايىستارىندا ماكسيم باتيۋتەنكو، ارۋجان ساعىندىقوۆا جانە ساندۋعاش كەنجەبايەۆا ەل نامىسىن قورعايدى.
ۆاشينگتون قالاسىندا ءبىرىنشى ساناتتاعى ITF Juniors جارىسىندا دانا بايداۋلەت تاريحي تابىسقا قول جەتكىزدى. ەكىنشى اينالىمدا دانا ءوز جاسىنداعىلار اراسىندا دۇنيەجۇزىلىك رەيتينگىدە 37-ورىندا تۇرعان جاپونيالىق ساياكي يشيمەن امەريكا جاسوسپىرىمدەر دودالارىنىڭ تاريحىندا ەڭ ۇزاق ماچتى وتكىزدى. د. بايداۋلەت 4 ساعات 52 مينۋتقا سوزىلعان كەزدەسۋدە قارسىلاسىن 7:6 (7:3) 6:7 (5:7) 7:6 (7:4) ەسەبىمەن جەڭدى.