اعىلشىننىڭ اتاقتى «چەلسي» فۋتبول كلۋبى 16 جاستاعى قازاقستاندىق شابۋىلشى داستان ساتپايەۆتى ءوز اكادەمياسىنا قابىلدادى. بۇرىن ول «قايرات» كلۋبىنىڭ جاسوسپىرىمدەر كومانداسىندا ويناپ، جوعارى شەبەرلىگىمەن كوزگە تۇسكەن. بۇل تۋرالى BBC ءجۋرناليسى نيزار كينسەللا الەۋمەتتىك جەلىدەگى پاراقشاسىندا حابارلادى.
ساتپايەۆ وتكەن جىلدىڭ جەلتوقسان ايىندا «چەلسيدە» سىناقتان وتكەن. جاس شابۋىلشىنىڭ شەبەرلىگى كلۋب وكىلدەرىن قاتتى تاڭ قالدىرعان. 2024 جىلعى ماۋسىمدا داستان قازاقستاننىڭ U-19 قۇراماسىندا جانە QJ ليگاسىندا ويناپ، تاماشا ناتيجەلەر كورسەتتى. 12 ماچتا ول 19 گول سوعىپ، 7 ناتيجەلى پاس بەرگەن.
ەۋروپا كلۋبتارىنىڭ ورتالىق ازيا ويىنشىلارىنا دەگەن قىزىعۋشىلىعىنىڭ ءوسۋى بايقالادى. بۇعان دەيىن «مانچەستەر سيتي» وزبەك قورعاۋشىسى ابدۋكودير حۋسانوۆپەن كەلىسىمشارت جاساسقان ەدى. ەندى «چەلسي» دە وسى باعىتتى ۇستانا وتىرىپ، قازاقستاندىق جاس تالانتقا سەنىم ارتۋدا.
ساتپايەۆتىڭ رەسمي تانىستىرىلىمى ونىڭ 18 جاسقا تولعاننان كەيىن وتەدى دەپ كۇتىلۋدە. قازىرگى ۋاقىتتا «قايرات» پەن «چەلسي» اراسىنداعى كەلىسىمنىڭ ەگجەي-تەگجەيلەرى جاريالانعان جوق. دەگەنمەن، BBC ينسايدەرىنىڭ مالىمەتىنشە، بارلىق تاراپتار كەلىسىمگە كەلگەن.
الداعى ۋاقىتتا داستان «چەلسيدىڭ» جاسوسپىرىمدەر كوماندالارىندا ونەر كورسەتەدى. ەگەر ول اعىلشىن فۋتبولىنا ءساتتى بەيىمدەلسە، نەگىزگى قۇرامعا كىرۋگە مۇمكىندىك الادى.