قازاقستاندىق فۋتبولشى نۇرالى الىپكە فرانسيالىق "پسج" جانە انگليالىق "مانچەستەر سيتي" كوماندالارىنان ۇسىنىس تۇسكەن، دەپ حابارلايدى Almaty-akshamy.kz.
بۇل تۋرالى "قايرات" فۋتبول كلۋبىنىڭ باقىلاۋ كەڭەسىنىڭ ءتوراعاسى قايرات بورانبايەۆ بلوگەر ارتۋر اسقارۇلىنا بەرگەن سۇحباتىندا ايتىلعان.
"بىزدە "پسج" جانە "مان سيتيدەن" ۇسىنىس بار. جالپى، ورتاق اڭگىمە دەۋگە بولادى. باسقا كلۋبتاردان دا ۇسىنىستار ءتۇسىپ جاتىر"، - دەدى قايرات بورانبايەۆ. ايتا كەتەيىك، ءقازىر نۇرالى ءالىپ رەسەيلىك "زەنيت" فۋتبول كلۋبىندا وينايدى. ول وسى ماۋسىمدا 37 ماچ وتكىزىپ، 1 گول سوقتى. سونداي-اق رەسەي چەمپيونى اتاندى جانە ەل كۋبوگىن جەڭىپ الدى. نۇرالى – اقتاۋدىڭ تۋماسى. سەگىز جاسىنان باستاپ "كاسپيي" اكادەمياسىندا فۋتبولمەن اينالىسقان. 2015 جىلى "قايرات" اكادەمياسىنا اۋىسىپ، ارادا ءۇش جىل وتكەن سوڭ وسى كلۋب ساپىندا العاش رەت الاڭعا شىقتى. نۇرالى "قايرات" ساپىندا جالپى ەسەبى 99 ماچ وتكىزگەن.
Transfermarkt پورتالىنىڭ مالىمەتىنشە، فۋتبولشىنىڭ ترانسفەرلىك نارىقتاعى قۇنى – 3 ميلليون ەۋرو.