بۇل تۋرالى قازاقستاننىڭ سىرتقى ىستەر مينيسترلىگى حابارلادى.
قىرعىزستاندا بولعان جويقىن سەلدەن قازا تاپقاندار ىشىندە قازاقستاندىق ەكى بالا بار، دەپ حابارلايدى Almaty-akshamy.kz قازاقستاننىڭ سىرتقى ىستەر مينيسترلىگىنە سىلتەمە جاساپ.
مينيسترلىكتىڭ حابارلاۋىنشا، تاعى ەكى بالا جوعالىپ كەتكەن.
"28 ماۋسىمدا قىرعىزستاندا نوسەر جاۋىن-شاشىن بولۋىنا بايلانىستى وش وبلىسىنىڭ نووقات اۋدانىندا جويقىن سەل ءجۇرىپ، سالدارىنان تۇرعىندار مەن تۋريستەر زارداپ شەكتى. قىرعىزستاننىڭ توتەنشە جاعداي مينيسترلىگىنىڭ الدىن الا بەرگەن اقپاراتى بويىنشا، قازا تاپقانداردىڭ اراسىندا قازاقستاننىڭ كامەلەتكە تولماعان ازاماتتارى بار. قازىرگى تاڭدا ەكى بالانىڭ دەنەسى تابىلىپ، تاعى ەكەۋىن ىزدەۋ جۇمىستارى جالعاسىپ جاتىر"، - دەلىنگەن حابارلامادا.
ۆەدومستۆو اتاپ وتكەندەي، تابيعي اپات ورنىندا قىرعىز تاراپىنىڭ قۇتقارۋ قىزمەتتەرى جۇمىس ىستەپ جاتىر.
"قازاقستاندىق ديپلوماتتار جەرگىلىكتى بيلىكپەن تۇراقتى بايلانىستا. ءبىزدىڭ قىرعىزستانداعى ەلشىلىگىمىز قايتىس بولعان بالالاردىڭ تۋىستارىنا بارلىق قاجەتتى كومەك كورسەتىپ جاتىر. بۇل قايعىلى وقيعا سىرتقى ىستەر مينيسترلىگىنىڭ ەرەكشە باقىلاۋىندا"، - دەپ اتاپ ءوتتى مينيسترلىك.
وسىعان بايلانىستى قازاقستان سىرتقى ىستەر ءمينيسترى مۇرات نۇرتىلەۋ قىرعىزستان ءسىم باسشىسى جەەنبەك كۋلۋبايەۆپەن تەلەفون ارقىلى سويلەسىپ، توتەنشە جاعدايدىڭ ءمان-جايىن جانە ەكى ەلدىڭ ءتيىستى مەملەكەتتىك ورگاندارىنىڭ ءوزارا ءىس-قيمىلىن تالقىلادى.
قىرعىزستاننىڭ وش وبلىسىنىڭ نووقات اۋدانىندا جويقىن سەل بولىپ، جەتى ادام قازا تاپقان.