قازاقستاندىق ديزاينەر الەمدىك برەندتەرمەن جۇمىس ىستەيدى
رۋستام سادىروۆ قىتايدا ون جىلعا جۋىق ەڭبەك ەتىپ كەلەدى. قازاقستاندىق ديزاينەر بەيجىڭدەگى قىسقى وليمپيادا ويىندارىنىڭ برەندينگىن جانە كونكيشىلەرگە ارنالعان مەدالدار مەن مەرەيتويلىق بەلگىلەردى جاساۋعا اتسالىستى. وسى ۋاقىت ىشىندە ول ءىرى قىتايلىق جانە حالىقارالىق كومپانيالارمەن جۇمىس ىستەگەن، دەپ حابارلايدى Almaty-akshamy.kz
«وليمپيادا كوميتەتىنىڭ برەندينگى مەن ديزاينىنىڭ نەگىزگى يدەياسىن كۋراتورىم، كومپانيا ديرەكتورىمەن بىرگە ازىرلەدىم. ءوزىم جاساعان اۋقىمدى جۇمىستىڭ ءبىرى – وسىدان ەكى جىل بۇرىن وتكەن وليمپيادا كورمەسىنىڭ كىرەبەرىس قاقپاسى. كوپتەگەن نۇسقانىڭ ىشىنەن مەنىكى جەڭىپ شىقتى. قاقپانى مۇز الەمىنە كىرگەندەي، ەرەكشە سەزىم قالدىراتىنداي ەتىپ جاسادىم. ءبىرىنشى ورىندى، ياعني التىن مەدالدى ءبىر عانا سپورتشى جەڭە الادى. بارلىق توپتامادان ءبىز ءبىر التىن جاسادىق»، - دەدى ينجەنەر-ازىرلەۋشى، ديزاينەر رۋستام سادىروۆ.
ەڭبەك جولىن تۋعان جەردە باستاعان رۋستام كەيىن قىتايعا بارىپ، سول ەلدىڭ ۇلكەن نارىعىندا باعىن سىناپ كورۋگە بەل بۋعان. جۇمىس بارىسىندا الەمدىك بەدەلى بار تەحنولوگيالىق كومپانيالارمەن بىرىگىپ جۇمىس اتقارعان. ديزاينەردىڭ ايتۋىنشا، بۇگىندە اۆتوموبيل جاساۋدان باسقا بارلىق ديزاين ءتۇرىن وقىپ، مەڭگەرىپ العان. ەندىگى جوسپارى – ءوز تاجىريبەسىن وتانىندا ىسكە جاراتۋ.
«قىتايدا وتكەن توعىز جىل ىشىندە ءومىرىم مۇلدەم باسقا باعىتقا بۇرىلدى. گرافيكالىق، ونەركاسىپتىك، كورمەلىك ديزاينداعى تاجىريبەمدى ەسكەرە وتىرىپ، كوپتەگەن تانىمال برەندپەن جۇمىس ىستەدىم. ءوزىمنىڭ بىلىم-تاجىريبەمدى تۋعان جەرىمدە ىسكە اسىرسام دەيمىن. قازاقستاندا تالانتتى جاستار وتە كوپ. Facebook-تا حات الماسىپ تۇرامىز. سۇراق-جاۋاپتار دا كوپ. ءبىر قىزىعى، ءقازىر جاستار ءوزىن-وزى دامىتۋعا كوپ كوڭىل بولەدى»، - دەيدى ينجەنەر-ازىرلەۋشى، ديزاينەر رۋستام سادىروۆ.
رۋستام ديزاين سالاسىنداعى الەمدىك جاڭالىقتاردى قالت جىبەرمەي، ولاردى وقىپ-زەرتتەپ، ءوز شىعارماشىلىعىندا كەڭىنەن قولدانادى. «الەم ۇنەمى وزگەرىستە. ءبىلىم – بۇل نەگىزگى بازا بولسا، ال ۇزدىكسىز ءوزىن-وزى دامىتۋ – تابىستىڭ كىلتى»، – دەيدى قازاقستاندىق ديزاينەر.