ەكىجاقتى تاكتيكالىق-ارنايى وقۋ-جاتتىعۋلار قازاقستان مەن تاجىكستان قارۋلى كۇشتەرى اسكەري قىزمەتشىلەرىنىڭ قاتىسۋىمەن ءوتىپ جاتىر. ءىس-قيمىلدار «ماگوب» وقۋ ورتالىعىندا وتۋدە، دەپ حابارلايدى Almaty-akshamy.kz.
بىرلەسكەن وقۋ-جاتتىعۋدى وتكىزۋ تۋرالى شەشىم بيىلعى جىلدىڭ ءساۋىر ايىندا دۋشانبەدە وتكەن شتابتىق كەلىسسوزدەردە قابىلدانعان بولاتىن. كەزدەسۋدە تاراپتار ورتالىق ازيا وڭىرىندەگى تەرروريستىك جانە دىني-ەكسترەميستىك ۇيىمداردىڭ قىزمەتىنە بايلانىستى اسكەري-ساياسي جاعدايدى، قاۋىپ-قاتەرلەر مەن سىن-تەگەۋرىندەردى تالقىلادى. وسىعان سايكەس وقۋ-جاتتىعۋدىڭ مازمۇنى ازىرلەنىپ، تاۋلى جەردە ۇرىس جۇرگىزۋ تاسىلدەرى مودەلدەندى.
قازاقستان دەسانتتىق-شابۋىلداۋ اسكەرلەرى مەن قابىلداۋشى تاراپتىڭ ارنايى ماقساتتاعى بولىمشەلەرىنىڭ اسكەري قىزمەتشىلەرى تاۋلى جەرلەردە وقۋ-جاۋىنگەرلىك مىندەتتەر كەشەنىن پىسىقتايدى.
وقۋ-جاتتىعۋلار بولىمشەلەردىڭ دالالىق داعدىلارىن جەتىلدىرۋ، تاۋلى جەردە ارنايى ءىس-شارالاردى ورىنداۋ كەزىندە كومانديرلەردىڭ بولىمشەلەردى باسقارۋدا تاجىريبە الۋى، سونداي-اق ەكى ەل قارۋلى كۇشتەرىنىڭ بولىمشەلەرى اراسىنداعى ءوزارا ءىس-قيمىل مەن تاجىريبە الماسۋ ماقساتىندا وتكىزىلەدى. وقۋ-جاتتىعۋ 9 ماۋسىمعا دەيىن جالعاسادى.