الماتى وبلىسىندا دەسانتتىق-شابۋىلداۋ اسكەرلەرىنىڭ كوماندالىق قۇرامىمەن وقۋ-ادىستەمەلىك جيىن ءوتتى.
ەكى كۇندىك ءىس-شاراعا الماتى، تالدىقورعان، قونايەۆ گارنيزوندارىنان 200-گە جۋىق وفيسەر مەن سەرجانت قاتىستى، دەپ حابارلايدى Almaty-akshamy.kz.
ءىس-شارا دەسانتتىق-شابۋىلداۋ اسكەرلەرىنىڭ قولباسشىسى، گەنەرال-مايور الماز جۇماكەيەۆتىڭ باسشىلىعىمەن ءوتتى. جيىندى ۇيىمداستىرۋداعى ماقسات اسكەري بولىمدەردىڭ تىنىس-تىرشىلىگىن ۇيىمداستىرۋ، جاۋىنگەرلىك دايارلىق بويىنشا ساباقتار وتكىزۋ الگوريتمىن، جوعارى جاۋىنگەرلىك ازىرلىكتى جانە اسكەري ءتارتىپتى ساقتاۋ جونىندەگى ءىس-شارالاردى بىردەي تۇسىنۋگە كەلتىرۋ بولىپ تابىلادى.
«الەمدە بولىپ جاتقان وقيعالار قالىپتاسقان جاعدايدى جان-جاقتى تالداۋعا، قورعانىس قابىلەتىن ناقتى نىعايتۋ جانە اسكەرلەردىڭ جاۋىنگەرلىك ازىرلىگىن ارتتىرۋ جونىندە كەشەندى شارالار قابىلداۋعا مىندەتتەيدى»، – دەپ اتاپ ءوتتى گەنەرال-مايور الماز جۇماكەيەۆ.
قۇرامالاردىڭ، اسكەري بولىمدەردىڭ كومانديرلەرىنە، ولاردىڭ ورىنباسارلارىنا جانە باسقا دا لاۋازىمدى ادامدارعا قورعانىس ءمينيسترى مەن قارۋلى كۇشتەر باس شتابى باستىعىنىڭ جاۋىنگەرلىك ازىرلىكتىڭ، قارۋ-جاراق پەن وق-دارىلەردىڭ ساقتالۋىن، قارۋ-جاراق پەن اسكەري تەحنيكانىڭ ءتيىستى پايدالانىلۋىن قامتاماسىز ەتۋ جونىندەگى تالاپتارى جەتكىزىلدى.
تەحنيكالىق قامتاماسىز ەتۋ باسقارماسى ۇيىمداستىرعان پراكتيكالىق ساباقتا دالالىق جاعدايدا اۆتوموبيل جانە بروندى تانك تەحنيكاسىن جوندەۋ بويىنشا وقۋ-جاتتىعۋ ورىندارى ورنالاستىرىلدى. جاۋىنگەرلىك ماشينالاردى جۇرگىزۋدى ۇيىمداستىرۋ، ولاردى تەمىرجول پلاتفورماسىنا تيەۋ جانە ءتۇسىرۋ بويىنشا ساباقتار وتكىزىلدى.
جيىن اياسىندا عىلىمي-تەوريالىق كونفەرەنسيا ءوتتى. وندا قازىرگى كەزدەگى دەسانتشىلاردىڭ ورىندايتىن مىندەتتەرى قارالدى.
اسكەر قولباسشىسى جەكە قۇرامنىڭ نازارىن دەسانتتىق-شابۋىلداۋ اسكەرلەرىنىڭ ەل قارۋلى كۇشتەرىنىڭ قۇرامداس بولىگى رەتىندە ءتۇرلى دەڭگەيدەگى جانە قارقىندىلىقتاعى اسكەري قاقتىعىستارعا عانا ەمەس، تەرروريزمگە قارسى ارەكەتتەرگە دە دايىن بولۋى كەرەك ەكەندىگىنە اۋداردى.
شارا سوڭىندا 2022 وقۋ جىلىنداعى قىزمەتتىڭ قورىتىندىسى شىعارىلدى. جاۋىنگەرلىك دايىندىقتىڭ، قارۋ-جاراق پەن اسكەري تەحنيكانى كۇتىپ ۇستاۋدىڭ جانە اسكەري ءتارتىپتىڭ جاي-كۇيى بويىنشا 38ء-شى دەسانتتىق-شابۋىلداۋ قۇراماسى ۇزدىك دەپ تانىلدى.