الماتىداعى №7 قالالىق كلينيكالىق اۋرۋحانانىڭ ورتوپەد ماماندارى 60 جاستاعى ايەلگە اسا كۇردەلى وتا جاسادى. قيمىل-تىرەك جۇيەسىندەگى دەرت سالدارىنان اۋىر كەسەلگە دۋشار بولعان ناۋقاستىڭ ۇزىلگەن بۋىنى دۇرىس بىتپەي، اسىق جىلىك شىبىعى جانسىزدانىپ، سال بولا باستاعان دەگەن دياگنوز قويىلعان بولاتىن، دەپ حابارلايدى اlmaty-akshamy.kz.
وتا گەرمانيانىڭ گەسسەن جانە ماربۋرگ ۋنيۆەرسيتەتتىك كلينيكاسىنىڭ پروفەسسورى رەينەر شنەتتلەردىڭ قاتىسۋىمەن وتكەن شەبەرلىك كلاسى بارىسىندا جاسالدى. №7 اۋرۋحانانىڭ تراۆماتولوگيا جانە ورتوپەديا بولىمشەلەرىندە العاش رەت ريەۆيزيوندىق پروتەزدەر ورناتىلدى. جاڭا تەحنولوگيانى الەمدە تاجىريبەگە پروفەسسور شنەتتلەر ارىپتەستەرىمەن بىرگە قولدانىسقا ەنگىزگەن.
تىزە بۋىنىن ريەۆيزيالىق ەندوپروتەزدەۋ – بۇل ەندوپروتەز بولىكتەرىن اۋىستىرۋعا ارنالعان وتا. وپەراسيا كەزىندە پروتەزدىڭ تۇراقسىز، زاقىمدالعان نەمەسە وزگەرىسكە ۇشىراعان بولىكتەرى الىپ تاستالىپ، ورنىنا جاڭاسى ورناتىلادى. ەندوپروتەز تىزە بۋىنىنىڭ زاقىمدانۋ دەڭگەيىنە، بۋىنداردىڭ جاعدايىنا جانە باسقا فاكتورلارعا قاراي تاڭدالادى.
ءساتتى جاسالعان وتا ناتيجەسىندە ناۋقاس قالىپتى ومىرگە ورالىپ، اۋىرسىنۋدان ارىلىپ، ءوز بەتىنشە ءجۇرىپ-تۇراتىن بولدى. بۇرىن مۇنداي پاسيەنتتەر مۇگەدەكتىك ارباسىنا تاڭىلاتىن بولسا، قازىرگى زاماناۋي يمپلانتتاردىڭ وزىق تەحنولوگيالارى ارقاسىندا ولاردى اياققا تۇرعىزۋعا مۇمكىندىك تۋىپ وتىر.
«تىزە ءپىشىنى بۇزىلىپ، 4-دارەجەلى ارتروزبەن اۋىراتىن ناۋقاس ءبىر جىل بۇرىن ءوزى تۇراتىن وڭىردە تىزە بۋىنىنا وتا جاساتقان. اياققا ەندوپروتەز ورناتىلعان، ءبىراق 3-4 ايدان كەيىن اۋىر جاراقات الىپ، جامباس سۇيەگى سىنىپ، تىزەنىڭ قاپتالىنداعى بۋىن ۇزىلگەن. سالدارىنان پروتەز ورنىنان قوزعالىپ كەتىپ، قاتتى اۋىرسىنۋ سەزىمى پايدا بولدى. ناۋقاس بىرنەشە ەمدەۋ مەكەمەسىنىڭ تابالدىرىعىن توزدىرىپ، اقىرىندا جەتىنشى اۋرۋحانانى تاڭدادى. پاسيەنتكە جاڭا زاماناۋي ەندوپروتەز ورناتۋ تۋرالى ۇسىنىس جاسادىق. بۇل جەردە سۇيەك قۇرىلىمىنىڭ جەتىسپەۋشىلىگى، بۋىن اپپاراتىنىڭ زاقىمدانۋى سياقتى اۋىر دياگنوزدار بار. مۇنداي جاعدايدا كادىمگى پروتەزدەر جارامسىز»، – دەيدى اۋرۋحانانىڭ ورتوحيرۋرگيا بولىمشەسى مەڭگەرۋشىسى ارنات بايزاقوۆ.
«كلينيكا وتە كۇردەلى جاعداي. قايتا جاسالعان وپەراسيا بىرىنشىگە قاراعاندا الدەقايدا كۇردەلى سانالادى. ءبىراق ءبىز ارىپتەستەرمەن بىرلەسە وتىرىپ، ويداعى ناتيجەگە قول جەتكىزدىك. يننوۆاسيالىق DX جۇيەسىن قولدانا وتىرىپ، پاسيەنتتىڭ سول جاق تىزە بۋىنىن الماستىردىق. وتا 1،5 ساعاتقا سوزىلدى، ناۋقاس كوپ قان جوعالتقان جوق (شامامەن 200-250 مل). پاسيەنت شىعىس قازاقستان وبلىسىنىڭ تۇرعىنى. بىزگە پورتال ارقىلى جاتقىزىلدى، جوعارى تەحنولوگيالى كومەك ءمامس قاراجاتى ەسەبىنەن كورسەتىلدى»، – دەپ اتاپ ءوتتى ارنات بايزاقوۆ.
دارىگەردىڭ ايتۋىنشا، ناۋقاس ءقازىر بەلسەندى قيمىل-قوزعالىس پەن ەرتە رەابيليتاسياعا دايىندالىپ جاتىر. وڭالتۋ شارالارى بولىمشە ىشىندە وتەدى.
تاجىريبەلى دارىگەرلەردىڭ بىلىكتىلىگىنىڭ، يننوۆاسيالىق تەحنولوگيالار مەن اۋرۋحاناداعى قوندىرعىلاردىڭ ارقاسىندا وتا ءساتتى ءوتىپ، ناۋقاس قالىپتى ومىرگە قايتا مۇمكىندىك الدى.