بۇل شارا بۇكىل رەسپۋبليكانى قامتيتىن بولادى.
قازاقساننىڭ قارجى نارىعىن رەتتەۋ جانە دامىتۋ اگەنتتىگى الماتى قالاسىنىڭ اكىمدىگىمەن الەۋمەتتىك از قامتىلعان بورىشكەرلەردى يپوتەكا قارىزى ءۇشىن جالعىز باسپاناسىنان شىعارماۋ تۋرالى مەموراندۋمعا قول قويىلعانىن ءمالىم ەتتى، دەپ حابارلايدى Almaty-akhamy.kz قازاقپاراتقا سىلتەمە جاساپ.
«23 قىركۇيەكتە قارجى نارىعىن رەتتەۋ جانە دامىتۋ اگەنتتىگى، الماتى اكىمدىگى، بانك ومبۋدسمەنى، بانكتەر جانە قوعامدىق بىرلەستىكتەر اراسىندا حالىقتىڭ الەۋمەتتىك وسال توپتارىنا جاتاتىن بورىشكەرلەردىڭ يپوتەكالىق قارىزى ءۇشىن جالعىز تۇرعىن ءۇيىن الىپ قويۋ جانە جالعىز باسپاناسىنان شىعارۋ شارالارىن توقتاتا تۇرۋدى كوزدەيتىن ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويىلدى»، - دەپ جازىلعان اگەنتتىك بەرگەن تۇسىنىكتەمەدە.
اگەنتتىكتىڭ باسپا ءسوز قىزمەتى ماماندار مەموراندۋم جوباسىمەن ماۋسىم ايىنان بەرى جۇمىس ىستەگەنىن، ازىرگە مەموراندۋم الماتى قالاسىنىڭ اكىمدىگىمەن عانا قول قويىلعانىمەن، شارا كەيىن بۇكىل رەسپۋبليكانى قامتيتىنىن ايتادى.
«قۇجات قول قويىلعان كۇنىنەن باستاپ كۇشىنە ەنەدى جانە 12 اي بويى كۇشىندە بولادى»، - دەپ جازىلعان اگەنتتىكتىڭ رەسمي مالىمەتىندە.