Walt Disneyء-دىڭ جانە «ماشا مەن ايۋ» جوباسىنىڭ ماماندارى قازاق انيماتورلارىنا ءدارىس وقيدى
الەمگە تانىمال مۋلتفيلمدەردىڭ جارىق كورۋىنە تىكەلەي اتسالىسقان ماماندار تۇركىستاندا وتەتىن حالىقارالىق ÁMEN انيماسيالىق فيلمدەر كينوفەستيۆالىندە ارنايى ءدارىس وقىپ، ترەنينگتەر وتكىزەدى، دەپ حابارلايدى اlmaty-akshamy.kz قازاقپارات سايتىنا سىلتەمە جاساپ.
«ءوز قىزمەتىن «سويۋزمۋلتفيلم» ستۋدياسىنان باستاپ، امەريكالىق World Disney ستۋدياسىندا شىڭدالعان سۋرەتشى-انيماتور الەكساندر دوروگوۆ فەستيۆال قاتىسۋشىلارىنا يدەيادان باستاپ، انيماسيالىق ءفيلمدى بەينەلەۋگە دەيىنگى پروسەستى بايانداپ، باستى كەيىپكەردى ىزدەۋدىڭ قىر-سىرىن تۇسىندىرەدى. «قاپ، بالەم، تۇرا تۇر!» (نۋ، پوگودي)، «مۋلان»، «ارىستان پاتشا» (The Lion King)، «فيكسيكتەر»، «ليلو مەن ستيچ» (Lilo & Stitch) ەكىلدى الەمگە تانىمال جوبالارعا قاتىسقان ماماننىڭ ءدارىسى ونلاين وتەدى. ال بريتان ساراپشىسى، «Zontul films limited» انيماسيالىق كومپانياسىنىڭ ديرەكتورى، پروفەسسور، جازۋشى تيم ۋيلسون ونلاين دارىسىندە باتىس انيماسيا سالاسىنىڭ ەرەكشەلىكتەرىنە توقتالىپ، جەكە تاجىريبەسىن ورتاعا سالادى»، - دەپ حابارلادى كينوفەستيۆال ۇيىمداستىرۋشىلارى.
تاعى ءبىر اعىلشىن مامانى قاتىسۋشىلارعا دەرەكتى فيلم تۇسىرۋدە انيماسيا ەلەمەنتتەرىن قولدانۋدىڭ ۇتىمدىلىعى جايلى ايتىپ بەرەدى. كينورەجيسسەر، جازۋشى جانە سۋرەتشى وليۆەر گاي-ۋوتكينس تۇسىرگەن دەرەكتى فيلمدەر الەمگە تانىمال كينوفەستيۆالدەردىڭ جۇلدەگەرى اتانعان. جازۋشىلىق قىرىنان تانىلعان ۋوتكينستىڭ كوركەمسۋرەت تۋىندىلارى دا كورمەلەرگە ءجيى قويىلادى.
قوناقتار قاتارىندا كۇللى الەم بالالارىنا ەرەكشە تانىمال «ماشا مەن ايۋ» جوباسىنىڭ رەجيسسەرى ناتاليا مالگينا بار. رەسەيلىك مامان ونلاين ءدارىس بارىسىندا 40-تان استام تىلگە اۋدارىلعان «ماشا مەن ايۋ» تۋىندىسىنىڭ جاسالۋ بارىسىنا توقتالادى.
«تۇركىستانعا ارنايى كەلگەن تۇركيا انيماسيا سالاسىنىڭ ۇزدىكتەرى مۋساب گۇندۇز بەن مۇستافا احمەت قارا فەستيۆال قاتىسۋشىلارىمەن تىلدەسىپ، تاجىريبەلەرىمەن بولىسەدى. انيماسيا رەجيسسەرى، كوميكس جانە قوزعالىس سۋرەتشىسى مۇستافا احمەت قارا كوميكس جاساۋدىڭ قىر-سىرىنا توقتالسا، Cordoba انيماسيا ستۋدياسىنىڭ نەگىزىن قالاۋشى مۋساب گۇندۇز اۋديتوريانىڭ جاس ەرەكشەلىگىنە قاراي جوبا جاساۋدىڭ نەگىزدەرىن تانىستىردى»، - دەيدى ۇيىمداستىرۋشىلار.
سونداي-اق، فەستيۆال قوناقتارى قازاقستاننىڭ ۇزدىك انيماسيالىق كينوستۋديالارىنىڭ كورمەسىن تاماشالاپ، انيماسيا جاساۋدىڭ ەرەكشەلىكتەرىمەن تانىسادى.