QS WUR حالىقارالىق اكادەميالىق رەيتينگىنە ەنگەن قازاقستاندىق جوعارى وقۋ ورىندارىنىڭ سانى رەكوردتىق دەڭگەيدى كورسەتتى
QS WUR الەمدەگى ەڭ بەدەلدى رەيتينگتەردىڭ ءبىرى بولىپ تابىلادى. سونداي-اق بيىل كەيبىر ۋنيۆەرسيتەتتەر رەيتينگتە بىرنەشە ورىنعا كوتەرىلىپ، ءوز پوزيسيالارىن نىعايتا ءتۇستى، دەپ حابارلادى Almaty-akshamy.kz. ق ر ءبىلىم جانە عىلىم مينيسترلىگىنە سىلتەمە جاساپ.
ءال-فارابي اتىنداعى قازاق ۇلتتىق ۋنيۆەرسيتەتى كەزەكتى رەت 175-ورىنعا تۇراقتاپ، الەمنىڭ 200 ۇزدىك ۋنيۆەرسيتەتىنىڭ قاتارىنا ەندى. ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى 90 پوزيسياعا كوتەرىلىپ 328-ورىندى، ال مۇحتار اۋەزوۆ اتىنداعى وڭتۇستىك قازاقستان ۋنيۆەرسيتەتى 482-ورىندى يەلەنىپ، ۇزدىك 500 وقۋ ورنىنىڭ قاتارىنان كورىندى. سونىمەن قاتار رەيتينگكە Satbayev University، قازاق ۇلتتىق اگرارلىق زەرتتەۋ ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، س.ج. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتى كىردى.
«رەيتينگ تاريحىنا كوز جۇگىرتسەك، بيىل ونىڭ قۇرامىنا قازاقستاندىق جوعارى وقۋ ورىندارىنىڭ رەكوردتىق سانى كىردى. رەيتينگكە ەنگىزىلگەن 14 جوعارى وقۋ ورنىنىڭ جەتەۋى سوڭعى جىلى ءوز پوزيسيالارىن جاقسارتا ءتۇستى. بۇل قازاقستاندىق جوعارى ءبىلىمنىڭ حالىقارالىق دەڭگەيدەگى تانىمالدىلىعىنىڭ ارتا تۇسكەندىگىن كورسەتەدى»، – دەپ اتاپ ءوتتى ق ر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويبايەۆ.
جوعارى وقۋ ورىندارىنىڭ پوزيسيالارىن ەسەپتەۋ كەزىندە رەيتينگتە اكادەميالىق توپتار مەن جۇمىس بەرۋشى ۇيىم وكىلدەرىنەن جينالعان ساۋالنامالاردىڭ ناتيجەلەرى، سونداي-اق 2015 جىلدان باستاپ 2019 جىلعا دەيىنگى كەزەڭدەگى 14،7 ميلليون جاريالانىم ەسكەرىلگەنىن اتاپ وتكەن ءجون. الەمدىك رەيتينگتەردە ىلگەرىلەۋ – قازاقستاندىق ءبىلىم بەرۋ ساپاسىنىڭ ودان ءارى جاقسارا ءتۇسۋىنىڭ جانە ۋنيۆەرسيتەتتەردىڭ جوعارى مارتەبەسىنىڭ ايقىن دالەلى بولىپ تابىلادى.