قازاقستان 2024 جىلى قۇقىقتىق رەفورمالاردى جەتىلدىرۋ مەن ازاماتتاردىڭ قۇقىقتارىن قورعاۋدى كۇشەيتۋ باعىتىندا ايتارلىقتاي جەتىستىكتەرگە قول جەتكىزدى. مەملەكەت قۇقىق قورعاۋ سالاسىن دامىتۋدى جالعاستىرىپ، ادام قۇقىقتارى جونىندەگى ۋاكىل ينستيتۋتىنىڭ ءرولىن ارتتىرۋدا.
ازاماتتاردىڭ قۇقىقتىق مادەنيەتى مەن مەملەكەتتىك ينستيتۋتتارعا سەنىمى ارتىپ كەلەدى. 2024 جىلى ادام قۇقىقتارى جونىندەگى ۋاكىل كەڭسەسىنە 6،5 مىڭنان استام ءوتىنىش ءتۇستى، بۇل 2023 جىلمەن سالىستىرعاندا 11%-عا كوپ. بۇل كورسەتكىش ازاماتتاردىڭ ومبۋدسمەندى ءوز قۇقىقتارىن قورعاۋدىڭ ناقتى مەحانيزمى رەتىندە قابىلدايتىنىن بىلدىرەدى.
جىل ىشىندە لاۋازىمدى تۇلعالاردىڭ جاۋاپكەرشىلىگى كۇشەيىپ، وتىنىشتەردى قاراۋ ناتيجەسىندە 94 مەملەكەتتىك قىزمەتكەر تارتىپتىك، ال 5 لاۋازىمدى تۇلعا اكىمشىلىك جاۋاپكەرشىلىككە تارتىلدى. سونداي-اق ۋاكىل وكىلدەرىنىڭ قاتىسۋىمەن ءتورت قىلمىستىق ءىس قوزعالدى.
ۇستاۋ جاعدايلارىن مونيتورينگتەۋ ەرەكشە نازارعا الىندى. 2024 جىلى 770 مەكەمە تەكسەرىلىپ، 1 014 ۇسىنىس بەرىلدى، ونىڭ 81%-ى ورىندالدى. سونىمەن قاتار، ازاماتتاردى جەكە قابىلداۋ سانى ارتتى: جىل ىشىندە 2،7 مىڭ قابىلداۋ وتكىزىلىپ، ومبۋدسمەن ارتۋر لاستايەۆ 100-دەن استام ادامدى جەكە قابىلدادى. بۇل ءوزارا ارەكەتتەسۋدىڭ تيىمدىلىگىن كورسەتىپ، وتىنىشتەردىڭ 21%-ىندا ازاماتتاردىڭ قۇقىقتارى تىكەلەي قالپىنا كەلتىرىلدى.
قۇقىقتىق اعارتۋ سالاسىندا دا ۇلكەن قادامدار جاسالدى. «قۇقىقتىق ساعاتتار» جانە ب ا ق ارقىلى اقپارات تاراتۋ شارالارى 300 مىڭنان استام ادامدى قامتىدى. بۇعان قوسا، سوڭعى ەكى جىلدا ۋاكىل مەملەكەتتىك ورگاندارعا شامامەن 10 ماڭىزدى زاڭنامالىق باستاما ۇسىندى.
ادام قۇقىقتارى جونىندەگى ۇلتتىق ورتالىق زاڭدىلىق، تەڭدىك جانە وبەكتيۆتىلىك قاعيداتتارىن ۇستانۋدى جالعاستىرادى. ازاماتتاردىڭ قۇقىقتارى مەن بوستاندىقتارىن قورعاۋ – باستى مىندەت بولىپ قالا بەرەدى.