قازاقستاندا كۇمىس ءوندىرۋ ايتارلىقتاي تومەندەدى.
ءوندىرىس كولەمى قاتارىنان ەكىنشى جىل كۇرت تومەندەپ، 2011 جىلدان بەرى ەڭ تومەنگى كورسەتكىشكە جەتتى، دەپ حابارلايدى aqshamnews.kz.
Energyprom ساراپشىلارىنىڭ مالىمەتى بويىنشا، 2024 جىلدىڭ قاڭتارىنان تامىز ايىنا دەيىن ەلىمىزدە 484،4 توننا كۇمىس وندىرىلگەن. بۇل 2023 جىلدىڭ سايكەس كەزەڭىمەن سالىستىرعاندا 23،5%-عا از. وتكەن جىلى دا ءوندىرىس 8،6%-عا تومەندەگەن بولاتىن. سوڭعى 13 جىلدا قازاقستان كۇمىس ءوندىرۋ دەڭگەيى ەڭ تومەنگى كورسەتكىشكە دەيىن تومەندەدى.
قازاقستاندا كۇمىس نەگىزىنەن باسقا مەتالداردى — مىس، قورعاسىن، التىن جانە تاعى باسقا رەسۋرستاردى ءوندىرۋ كەزىندە قوسالقى ءونىم رەتىندە الىنادى. ەلىمىز تمد ەلدەرى اراسىندا كۇمىس ءوندىرۋدىڭ 23،9%-ىن قامتاماسىز ەتەدى جانە الەمدە 12-ورىندا تۇر (ءبىرىنشى ورىندا مەكسيكا، ەكىنشى ورىندا جۇڭگو).
وتكەن جىلى بۇكىل الەمدە كۇمىس ءوندىرۋ 0،7%-عا ازايعان. بۇل مەتالعا دەگەن سۇرانىس كوبىنەسە ونەركاسىپ سالاسىمەن بايلانىستى: كۇمىس قازىرگى تاڭدا كۇن پانەلدەرىن، ەلەكتروموبيلدەردى، ۇيالى تەلەفونداردى جانە باسقا دا قۇرىلعىلاردى وندىرۋدە كەڭىنەن قولدانىلادى.
قازاقستاندا مۇنداي ونەركاسىپتەر جوقتىڭ قاسى. سوندىقتان ەلدەگى كۇمىستىڭ باسىم بولىگى شەتەلگە ەكسپورتتالادى. 2023 جىلى قازاقستاننان 389،5 توننا كۇمىس ەكسپورتتالىپ، نەگىزىنەن اقش پەن ۇلىبريتانياعا جىبەرىلگەن.
قازاقستاننىڭ سوڭعى ۋاقىتتا التىندى ەكسپورتتاعان جالعىز ەل ەكەنى انىقتالدى.