اعىمداعى جىلدىڭ 25 ساۋىرىندە الماتى قالاسى «NARXOZ» ۋنيۆەرسيتەتىنىڭ الاڭىندا «سىبايلاس جەمقورلىققا قارسى ءبىلىم: قازاقستانداعى حالىقارالىق تاجىريبە جانە دامۋ پەرسپەكتيۆالارى» اتتى حالىقارالىق عىلىمي-پراكتيكالىق كونفەرەنسيا ءوتتى، دەپ حابارلايدى Almaty-akshamy.kz.
قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە، كونفەرەنسيادا بىرىككەن ۇلتتار ۇيىمىنىڭ ەسىرتكى جانە قىلمىس جونىندەگى باسقارماسى، قازاقستانداعى اقش مەملەكەتتىك دەپارتامەنتىنىڭ بيۋرو ءبولىمىنىڭ، USAID «بارشاعا ارنالعان سوت تورەلىگى» ءبىلىم بەرۋ جوباسىنىڭ، گونكونگتىڭ سىبايلاس جەمقورلىققا قارسى كۇرەس جونىندەگى تاۋەلسىز كوميسسياسىنىڭ، سەربيا ۋنيۆەرسيتەتتەرىنىڭ جانە ت.ب. شەتەلدىك ساراپشىلارى ءسوز سويلەدى.
سونداي-اق، ءىس-شاراعا قازاقستاندىق جوعارى وقۋ ورىندارىنىڭ، ونىڭ ىشىندە ءىىم، تجم، قورعانىس مينيسترلىگىنىڭ مامانداندىرىلعان وقۋ ورىندارىنىڭ، باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ رەكتورلارى، پرورەكتورلارى مەن وقىتۋشىلارى قاتىستى.
ماقساتى - ءبىلىم بەرۋ جانە اعارتۋ ارقىلى جەمقورلىققا قارسى مادەنيەتتى قالىپتاستىرۋدىڭ ۇلتتىق جانە حالىقارالىق تاجىريبەسىن، بۇۇ ەسىرتكى جانە قىلمىس جونىندەگى باسقارماسىنىڭ GRACE حالىقارالىق باستاماسىن ىسكە اسىرۋ ماسەلەلەرىن تالقىلاۋ.
كەزدەسۋ بارىسىندا قازاقستاندىق جەمقورلىققا قارسى ءبىلىم بەرۋ تاجىريبەسى ۇسىنىلدى، GRACE ماتەريالدارى نەگىزىندە «NARXOZ» ۋنيۆەرسيتەتى ازىرلەگەن جوو-لار ءۇشىن جەمقورلىققا قارسى تيپتىك وقۋ باعدارلاماسىنىڭ جاڭا جوباسى تانىستىرىلدى. بۇل باستامانى ەنگىزۋ 2022-2026 جىلدارعا ارنالعان سىبايلاس جەمقورلىققا قارسى ساياسات تۇجىرىمداماسىندا كوزدەلگەن.
سونداي-اق شەتەلدىك ساراپشىلارعا «AntiParaCraft» كۆەست-ويىنى، جەمقورلىققا قارسى ونلاين-وقىتۋ پلاتفورماسى، «ادالدىق الىپپەسى»، «پاراساتتىلىق ساعاتى»، «جەمقورلىققا قارسى مادەنيەت نەگىزدەرى» ديداكتيكالىق ويىندار جيناعى، جازعى جەمقورلىققا قارسى مەكتەپتەر، وليمپيادا، اكادەميالىق ادالدىق ليگاسى جانە ت.ب. سياقتى قولدانىستاعى جوبالار تانىستىرىلدى.
كونفەرەنسيا اياسىندا اگەنتتىكتىڭ سىبايلاس جەمقورلىققا قارسى ءبىلىم بەرۋ جانە مەديا-ماتەريالدارىنىڭ، ونىڭ ىشىندە سۋرەتتەر، كوميكستەر، ۇستەل ويىندارى، ادىستەمەلىك ماتەريالدار، وقۋلىقتار، بۋكلەتتەر، بەينەروليكتەر جانە ت. ب. كورمەسى ۇيىمداستىرىلدى.
ءىس-شارا قورىتىندىسى بويىنشا قاتىسۋشىلار جەمقورلىققا قارسى وقىتۋدى دامىتۋ جانە حالىقارالىق تاجىريبەنى يمپلەمەنتاسيالاۋ بويىنشا ىنتىماقتاستىقتى نىعايتۋ جانە كەڭەيتۋ ماسەلەلەرىن تالقىلادى.