30 وقۋشى سالتاناتتى تۇردە انت بەرءدى.
ماڭعىستاۋ وبلىسى اقتاۋ قالاسىنىڭ N22 ورتا مەكتەبى مەن مامانداندىرىلعان IT-ليسەيىنىڭ 30 وقۋشىسى سالتاناتتى تۇردە انت بەرىپ، رەسمي تۇردە «جاس سارباز» قوزعالىسىنىڭ قاتارىنا قوسىلدى، دەپ حابارلايدى Almaty-akshamy.kz قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
سالتاناتتى ءراسىم كاسپيي تەڭىزىنىڭ جاعالاۋىندا ءوتتى. وعان اقتاۋ گارنيزونىنىڭ اسكەري قىزمەتشىلەرى، قارۋلى كۇشتەردىڭ ارداگەرلەرى، قوعام وكىلدەرى قاتىستى.
ءجاسوسپىرىم بالالار قوزعالىسىنىڭ قاتارىنا قوسىلاتىندارعا ارناپ اسكەري-تەڭىز بازاسىنىڭ باستىعى، 2-دارەجەلى كاپيتان باۋىرجان مۇرات ۇلى، قارۋلى كۇشتەردىڭ ارداگەرى قايرات تولەپبايەۆ جانە "جاس سارباز" رەسپۋبليكالىق اسكەري-پاتريوتتىق قوزعالىسىنىڭ ءتوراعاسى مەيىربەك مەڭدىعالييەۆ ءسوز سويلەدى. ولار جاس ۇرپاققا ەل يگىلىگى جولىندا ادال قىزمەت ەتۋگە تىلەكتەستىگىن ءبىلدىردى.
«ءقازىر ءوزىمنىڭ جاس سارباز، جاس تەڭىزشى ەكەنىمدى ماقتان تۇتامىن. بارىنەن دە اسكەري-تەڭىز بازاسىنا بارعانىمىز قىزىقتى ءوتتى. بولاشاقتا وتانىمدى قورعاپ، اسكەري قىزمەتشى بولۋدى ارماندايمىن»، – دەدى العان اسەرىمەن بولىسكەن №22 ورتا مەكتەپتىڭ 9 سىنىپ وقۋشىسى ەلدوس سۇلەيمەن.
ءىس-شارا بارىسىندا جاس پاتريوتتارعا «ماڭعىستاۋ» زىمىراندى-ارتيللەريالىق كورابلىن ارالاتتى. اسكەري تەڭىزشىلەر ونىڭ قۇرىلىسى مەن مۇمكىندىكتەرى تۋرالى ايتىپ، قۇرال-جابدىقتارىن، كايۋتالارى مەن قارۋ-جاراقتارىن كورسەتتى.
اسكەري-تەڭىز كۇشتەرىنىڭ ماتروستارى وزدەرىنىڭ مەرزىمدى قىزمەت تاجىريبەسىمەن ءبولىسىپ، كۇندەلىكتى جۇمىس كۇندەرى مەن وقۋ-جاۋىنگەرلىك قىزمەتى قالاي ءوتىپ جاتقانىن ايتتى.
قازىرگى ۋاقىتتا «جاس سارباز» رەسپۋبليكالىق قوعامدىق بىرلەستىگى 7000-نان استام اسكەري-پاتريوتتىق كلۋبتىڭ باسىن قوستى. ولاردىڭ 100-دەن استامى اسكەري بولىمدەردىڭ جانىندا ورنالاسقان. جالپى قامتيتىن بالا سانى 2600-دەن اسادى. بۇعان 230 000-نان استام تاربيەلەنۋشى بالانى قامتيتىن «جاس سارباز» سىنىپتارى مەن Smart Sarbaz ۇيىرمەلەرى دە كىرەدى.
