پرەمەر-مينيستر ولجاس بەكتەنوۆ شىعىس قازاقستان وبلىسىنداعى بۇقتىرما سۋ قويماسى ارقىلى وتەتىن ەلىمىزدەگى ەڭ ۇزىن كوپىردىڭ اشىلۋىنا قاتىستى، دەپ حابارلايدى aqshamnews.kz.

اتالمىش كوپىر 6 اۋداندى – كۇرشىم، ۇلكەن نارىن، مارقاكول، كاتونقاراعاي، تارباعاتاي جانە زايسان اۋداندارىن بايلانىستىرادى.

كولىك ءمينيسترى مارات قارابايەۆ پرەمەر-مينيسترگە ۇزىندىعى 1316 مەتر ەكى جولاقتى اۆتوموبيل كوپىرىنىڭ قۇرىلىسى اياقتالعانى تۋرالى باياندادى. كوپىر تاۋلىگىنە 80 مىڭعا دەيىن كولىك وتكىزە الادى، وتكەلگە 18 شاقىرىم جاڭا جول تارتىلدى. جوبا وزىق ينجەنەرلىك تەحنولوگيالاردى قولدانا وتىرىپ جانە بارلىق ساپا ستاندارتتارىنا سايكەس ىسكە اسىرىلدى.

وبلىس تۇرعىندارىمەن كەزدەسۋدە پرەمەر-مينيستر جوبانى ىسكە اسىرۋ كولىكتىڭ جىل بويى ءقاۋىپسىز قوزعالىسىن قامتاماسىز ەتەتىنىن، شىعىس قازاقستاننىڭ الەۋمەتتىك-ەكونوميكالىق دامۋىنا سەرپىن بەرەتىنىن جانە ەلىمىزدىڭ كولىك-لوگيستيكا سالاسىنىڭ دامۋىنا وڭ اسەر ەتەتىنىن اتاپ كورسەتتى.

جاڭا كوپىر مەملەكەت باسشىسىنىڭ تاپسىرماسى بويىنشا تۇرعىنداردىڭ جايلىلىعى مەن قاۋىپسىزدىگىن ارتتىرۋ ماقساتىندا سالىندى. ايماقتا تۇرعىندار 50 جىل بويى جازدا نە پاروممەن، قىستا تىكەلەي نە مۇز ۇستىمەن جۇرگەنىن بىلەسىزدەر. قۇرىلىستىڭ سالىنۋىن جەرگىلىكتى تۇرعىندار ۇزاق كۇتتى، – دەپ اتاپ ءوتتى ولجاس بەكتەنوۆ.

ءوز كەزەگىندە، كوپىردىڭ اشىلۋىنا كەلگەن ايماق تۇرعىندارى كوپىر سۋ قويماسىنىڭ ەكى جاعىنداعى ەلدىمەكەندەر اراسىنداعى كولىك قاتىناسىن ەداۋىر جاقسارتاتىنىن، بۇل تۇرعىنداردىڭ جەڭىل قاتىناۋىن قامتاماسىز ەتەتىنىن، تاۋارلار قوزعالىسىن جەدەلدەتەتىنىن، قىزمەتتەرگە قولجەتىمدىلىكتى ارتتىرىپ، سونداي-اق وبلىستىڭ تۋريستىك الەۋەتىن اشۋعا مۇمكىندىك بەرەتىنى تۋرالى پىكىر ءبىلدىردى.

2019 جىلى وسى ءوڭىردىڭ حالقى ەلىمىزدىڭ پرەزيدەنتىنە ارىز-تىلەگىن جازعان. قاسىم-جومارت كەمەل ۇلى توقايەۆ حالىقتىڭ تىلەگىنە كوڭىل ءبولىپ، ەلدىڭ 60 جىل ارمانداعان كوپىرىن سالۋعا قازىنادان قاراجات ءبولدى. جوبادا ەڭبەك ەتكەن تەك ەلىمىزدىڭ ازاماتتارى. شەتەلدەن تارتىلعان بىردە-بىر مامان جوق. قانشاما كىسىگە جۇمىس تابىلدى. قۇرىلىس قىستىڭ ايازىندا، جازدىڭ اپتاپ ىستىعىندا دا جۇرگىزىلدى، – دەدى كۇرشىم اۋدانىنىڭ قۇرمەتتى ازاماتى باقىتحان ولمەسەكوۆ.

پرەمەر-مينيستر ءىرى جوبالاردى ىسكە اسىرۋ بارىسىندا وتاندىق ماماندار مەن مەردىگەر كومپانيالاردى تارتۋعا ەرەكشە نازار اۋدارىلاتىنىنا توقتالدى.

مەملەكەت باسشىسى اتالعان جوباعا، جالپى وڭىرلەردىڭ دامۋىناپ ۇلكەن كوڭىل ءبولىپ كەلەدى. ءسىز دۇرىس ايتتىڭىز، ءارى جۇمىس بەرىپ ءارى ينفراقۇرىلىمدىق بايلانىس پەن دامۋدى قامتاماسىز ەتەتىن مەگاجوبالار كوپ بولۋى كەرەك. سىرتتان ەشكىمدى تارتپاي-اق، ءبىزدىڭ ءوز قۇزىرەتىمىز دە جەتكىلىكتى. وسىنداي رەسپۋبليكالىق ماڭىزى بار وسىنداي ءىرى جوبالاردى جۇزەگە اسىرۋدى جالعاستىرامىز. ءقازىر پرەزيدەنتتىڭ تاپسىرماسى بويىنشا ۇكىمەت وتاندىق كاسىپكەردى، وتاندىق وندىرۋشىلەردى قولداۋ ساياساتىن جۇرگىزىپ جاتىر، – دەپ اتاپ ءوتتى ولجاس بەكتەنوۆ.

ەستەرىڭىزگە سالا كەتيىك، بۇعان دەيىن تاۋەلسىزدىك كۇنىنە وراي شىعىس قازاقستاندا ەلىمىزدەگى ەڭ ۇزىن كوپىردىڭ اشىلاتىنىن تۋرالى جازعان بولاتىنبىز.