سونىمەن قاتار قازاقستاننىڭ اۋە تاسىمالى مەن لوگيستيكا سالاسى وزگەرىستەرگە دايىندالۋدا.
ۋكرايناداعى جاعداي مەن الەمدىك قاۋىمداستىقتىڭ رەسەيگە قارسى سانكسيالارى اياسىندا قازاقستاننىڭ اۋە تاسىمالى جانە لوگيستيكا سالاسىندا وزگەرىستەر بولادى، دەپ حابارلايدى Almaty-akshamy.kz Finprom.kz سايتىنا سىلتەمە جاساپ.
سونىمەن، ورىن العان قاقتىعىس كەسىرىنەن اۋە كەڭىستىگىنىڭ جابىلۋىنا بايلانىستى اۋە اعىنىنىڭ ءبىر بولىگى قارا تەڭىز ايماعىنان قازاقستان اۋماعىنا قايتا باعىتتالدى، دەپ حابارلادى ق ر يندۋستريا مينيسترلىگى.
ءبىر كۇننىڭ ىشىندە ەلىمىزدىڭ اۋە كەڭىستىگى ارقىلى جوسپاردان تىس 257 رەيس قاتىنادى. وڭتۇستىك باعىت بويىنشا ەۋروپادان قىتايعا جانە وڭتۇستىك-شىعىس ازياعا رەيستەر سانىنىڭ ارتۋى قازاقستان ءۇشىن ايىنا 1،5 ميلليون دوللار قوسىمشا تابىس اكەلەدى.
قازاقستان رەسپۋبليكاسىنىڭ اەروناۆيگاسيالىق جۇيەسىنىڭ سىيىمدىلىعى قوسىمشا اۋە قوزعالىسىن شەكتەۋسىز قابىلداۋعا مۇمكىندىك بەرەدى، دەپ اتاپ ءوتتى مينيسترلىك.
سونىمەن قاتار، اعىمداعى جىلدىڭ اقپان ايىنىڭ قورتىندىسى بويىنشا، قازاقستان رەسپۋبليكاسىندا اۋەدەگى جولاۋشىلار تاسىمالى قىزمەتتەرىنىڭ باعاسى وتكەن جىلدىڭ وسى كەزەڭىمەن سالىستىرعاندا 17،7%-عا قىمباتتاعان.
ەلىمىزدىڭ كوپتەگەن ايماقتارى ءۇشىن بۇل سەكتورداعى باعانىڭ ءوسۋى وتە ماڭىزدى بولدى. ايتارلىقتاي قىمباتشىلىق شىعىس قازاقستان وبلىسىندا بايقالدى، مۇندا باعا ءبىر جىلدا 45،7%-عا ءوستى. باعا قىمباتتاۋ بويىنشا كوشباسشىلار ۇشتىگىنە ماڭعىستاۋ (43،2%) جانە تۇركىستان (34،8%) وبلىستارى دا كىردى.
ەلىمىزدىڭ ەكى وبلىسى – اقمولا جانە سولتۇستىك قازاقستان وبلىستارىندا باعا وزگەرگەن جوق، ال پاۆلودار مەن جامبىل وبلىستارىندا ءتىپتى تيىسىنشە 14،2% جانە 22،2%-عا تومەندەدى.
اعىمداعى جىلدىڭ قاڭتارىندا اۆياكومپانيانىڭ كىرىسى 20،9 ملرد تەڭگەنى قۇرادى، بۇل جىلدىق كورسەتكىشتە اقشالاي 6،6% ارتىق دەگەن ءسوز.
كىرىستىڭ باسىم بولىگى ءداستۇرلى تۇردە جولاۋشى تاسىمالداۋدان تۇسكەن: 20،4 ملرد تەڭگە. جۇك تاسىمالداۋدان تۇسكەن كىرىس 534،8 ملن تەڭگەنى، جۇرگىزۋشىسى بار كولىكتەردى ليزينگكە بەرۋدەن كەلگەن كىرىس كولەمى 215 ملن تەڭگەنى قۇرادى.
سالىستىرۋ ءۇشىن: وتكەن جىلدىڭ وسى كەزەڭىندە تۇسىمدەر 40،8%-عا تومەندەپ، 19،6 ملرد تەڭگەنى قۇرادى.
2022 جىلدىڭ قاڭتار ايىنىڭ قورىتىندىسى بويىنشا، قازاقستان رەسپۋبليكاسىنىڭ اۋە كومپانيالارى 527 مىڭ ادامدى تاسىمالدادى، بۇل ءبىر جىل بۇرىنعىدان 11%-عا از. ال جولاۋشىلار اينالىمى، كەرىسىنشە، ارتا تۇسكەن.
اۋە كولىگىمەن جۇك تاسىمالداۋ سالاسىندا ايتارلىقتاي تومەندەۋ بايقالدى. اعىمداعى جىلدىڭ قاڭتار ايىندا جۇك تاسىمالداۋ كولەمى وتكەن جىلدىڭ وسى كەزەڭىمەن سالىستىرعاندا 53،2 پايىزعا ازايىپ، 1،2 مىڭ توننانى قۇرادى. جۇك اينالىمى 2،6 ملن توننا-كيلومەتردى قۇرادى، بۇل 52،9-عا قىسقاردى دەگەن ءسوز.
