تانىمال قازاقستاندىق قارجىگەر، مەتاللۋرگ جانە ساياساتكەر داۋلەت سەمبايەۆ قايتىس بولدى
ەگەمەن قازاقستاننىڭ العاشقى بانكنوتىندا قولتاڭباسى بار تۇلعا بۇگىن تۇندە 87 جاسقا قاراعان شاعىندا دۇنيەدەن ءوتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
قارالى حاباردى ق ر ۇلتتىق بانكى راستادى. ول 1935 جىلى 10 تامىزدا الماتىدا دۇنيەگە كەلدى. توقسانىنشى جىلدارى داۋلەت سەمبايەۆ ۇلتتىق بانك ءتوراعاسى، پرەمەر-مينيستردىڭ ورىنباسارى قىزمەتتەرىن اتقاردى. داۋلەت سەمبايەۆ - قازاقستان پرەزيدەنتىنىڭ العاشقى ەكونوميكالىق باعدارلاماسىنىڭ قوس اۆتورلارىنىڭ ءبىرى. سونداي-اق، قازاقستانداعى ۇلتتىق ۆاليۋتانى ەنگىزۋگە قاتىسقان.
ەلدەگى قازىرگى بانك جۇيەسىن قالىپتاستىرۋدىڭ باسى-قاسىندا بولدى. 1958 جىلى قازاق تاۋ-كەن مەتاللۋرگيا ينستيتۋتىن ينجەنەر-مەتاللۋرگ ماماندىعى بويىنشا بىتىرگەن. وسى جىلدار ىشىندە پرەمەر-مينيستردىڭ ورىنباسارى، 1993-1996 جىلدارى - ۇلتتىق بانك ءتوراعاسى، سەنات دەپۋتاتى بولدى.
2009 جىلدىڭ جەلتوقسان ايىنان باستاپ حالىقارالىق بيزنەس اكادەمياسىنىڭ قامقورشىلىق كەڭەسىنىڭ مۇشەسى بولدى. وراز جاندوسوۆ، گريگوريي مارچەنكو جانە باسقا دا ەلىمىزدىڭ كورنەكتى قارجىگەرلەرى وزدەرىن سول كىسىنىڭ شاكىرتى سانايدى. داۋلەت حاميت ۇلى «قۇرمەت بەلگىسى» (1976)، ەڭبەك قىزىل تۋ (1981)، «پاراسات» (1996) وردەندەرىمەن جانە كسرو-نىڭ ەكى مەدالىمەن ماراپاتتالعان.