2023 جىلعى 1 قاڭتارداعى جاعداي بويىنشا، قازاقستاندىقتاردىڭ زەينەتاقى جيناقتارى 14،7 ترلن تەڭگەنى قۇرادى.
بجزق مالىمەتىنشە، 2022 جىلى بۇل كورسەتكىش 1،6 ترلن تەڭگەگە ءوستى. 2021 جىلى زەينەتاقى جيناقتارىنىڭ ءوسىمى تەك 1% قۇرادى. بۇل جيناقتاۋشى زەينەتاقى جۇيەسىنىڭ دامۋ قارقىنى، زەينەتاقى جيناقتارىنىڭ ءوسۋى جىل سايىن 15%-دان 20%-عا دەيىن بولعان كەزدە زەينەتاقى جيناقتارىنىڭ بالامالى ماقساتتارعا ايتارلىقتاي الىنۋىنا دەيىنگى كەزەڭدەردىڭ كورسەتكىشتەرىنە جوسپارلى تۇردە قايتارىلاتىنىن بىلدىرەدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
مىندەتتى زەينەتاقى جارنالارى (مزج) ەسەبىنەن قالىپتاستىرىلعان زەينەتاقى جيناقتارى 2023 جىلعى 1 قاڭتارعا 14،2 ترلن تەڭگەگە جەتىپ، ءبىر جىلدا 11،9% ۇلعايدى.
مىندەتتى كاسىپتىك زەينەتاقى جارنالارى (مكزج) بويىنشا زەينەتاقى جيناقتارىنىڭ سوماسى 12 ايدا 23،4% ۇلعايىپ، شامامەن 445،4 ملرد تەڭگە بولدى.
ەڭ ۇلكەن ءوسىمدى، ياعني 107% استام كورسەتكىشتى ەرىكتى زەينەتاقى جارنالارى (ەزج) بويىنشا جيناقتار بەردى. ولار 2022 جىلدىڭ قورىتىندىسى بويىنشا شامامەن 3،6 ملرد تەڭگەنى قۇرادى.
جيناقتاردىڭ جالپى ءوسىمى زەينەتاقى جارنالارى مەن ينۆەستيسيالىق تابىس تۇرىندەگى كىرىس اعىندارى ەسەبىنەن قامتاماسىز ەتىلدى. بۇل رەتتە سالىمشىلاردىڭ شوتتارىنا جارنالار تۇرىندە ءبىر جىل ىشىندە 1،7 ترلن تەڭگەدەن استام قاراجات ءتۇستى. بۇل 2021 جىلمەن سالىستىرعاندا 29 %-عا كوپ. مزج ەسەپكە الىناتىن جەكە زەينەتاقى شوتتارىنا (جزش) ءبىر جىل ىشىندە 1،65 ترلن تەڭگە ءتۇستى، مكزج – 77 ملرد تەڭگە (39%-عا ءوستى)، ەزج جارنالارى ءبىر جىل ىشىندە 2،3 ملرد تەڭگەنى قۇرادى (ءوسىم 190%).
2022 جىلى ينۆەستيسيالىق كىرىس 914 ملرد تەڭگەدەن استى. ياعني، وتكەن جىلدىڭ قورىتىندىسى بويىنشا اكتيۆتەردىڭ كىرىستىلىگى وڭ سيپاتقا يە.
بجزق-دان تولەمدەر تۇرىندەگى شىعىس اعىندارى جىل باسىنان بەرى شامامەن 1،2 ترلن تەڭگەنى قۇرادى. ونىڭ باسىم بولىگى تۇرعىن ءۇي جاعدايلارىن جاقسارتۋعا جانە ەمدەلۋگە ارنالعان ءبىرجولعى زەينەتاقى تولەمدەرى (بجت) – 918 ملرد تەڭگە. بۇل رەتتە بالامالى ماقساتتارعا تولەمدەر كولەمى 2021 جىلمەن سالىستىرعاندا 65%-عا تومەندەدى.
«جاس بويىنشا تولەمدەر 20% ۇلعايىپ، شامامەن 122 ملرد تەڭگە بولدى. ايتا كەتۋ كەرەك، بجزق-دان كەستە بويىنشا ورتاشا ايلىق تولەم سوماسى (زەينەت جاسىنا تولۋعا بايلانىستى) 29 973 تەڭگەنى، ال اي سايىنعى تولەمنىڭ ەڭ جوعارى سوماسى 707 326 تەڭگەنى قۇرادى»، - دەلىنگەن حابارلامادا.
سونداي-اق مۇراگەرلىك بويىنشا تولەمدەر 60،2 ملرد تەڭگە، ەل شەگىنەن تىس تۇراقتى تۇرۋعا كەتۋگە بايلانىستى تولەمدەر 48،3 ملرد تەڭگە، مۇگەدەكتىك بويىنشا تولەمدەر 2،5 ملرد تەڭگە، جەرلەۋگە تولەمدەر 5،3 ملرد تەڭگە، ساقتاندىرۋ ۇيىمدارىنا شامامەن 26 ملرد تەڭگە اۋدارىلدى.
2023 جىلعى 1 قاڭتارداعى جاعداي بويىنشا، بجزق-داعى جەكە زەينەتاقى شوتتارىنىڭ سانى 12،1 ملن بىرلىككە جەتتى. مىندەتتى زەينەتاقى جارنالارى بويىنشا – شامامەن 11 ملن بىرلىك. 2023 جىلعى 1 قاڭتارداعى جاعداي بويىنشا، مكزج بويىنشا شوتتار سانى 595 710 بىرلىكتى قۇرادى. ەزج ەسەبى بويىنشا 358 695 جزش اشىلدى.