ماماندار ۆيزالاردىڭ ءتۇرى قانداي بولاتىنىن جەتكىزدى.
مەملەكەت ۇكىمەتى ۆيزالاردىڭ جاڭا تۇرلەرىن ەنگىزۋدى كوزدەپ وتىر، دەپ حابارلايدى Almaty-akshamy.kz.
«مەملەكەت باسشىسى قاسىم-جومارت توقايەۆتىڭ بيىلعى 1 قىركۇيەكتەگى قازاقستان حالقىنا جولداۋىندا ەلىمىزدىڭ كوشى-قون ساياساتىنىڭ تيىمدىلىگىن ارتتىرۋ بويىنشا جاڭا شارالاردىڭ پاكەتى ۇسىنىلدى. ولاردى ىسكە اسىرۋ ماقساتىندا كوشى-قون ساياساتىنىڭ الداعى 5 جىلعا ارنالعان جاڭا تۇجىرىمداماسى شەڭبەرىندە رەسپۋبليكادا شەتەلدىكتەر ءۇشىن ەرەكشە جاعدايلاردى كوزدەيتىن باعالى داعدىلار مەن ينۆەستيسيالىق ۆيزالار ءۇشىن ارنايى ۆيزالار ەنگىزۋ كوزدەلەتىن بولادى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
مەملەكەت باسشىسىنىڭ تاپسىرماسىن ورىنداۋ ءۇشىن جاڭا تۇجىرىمداما شەڭبەرىندە قازاقستان ءۇشىن تاپشى جانە ءجيى تارتىلاتىن كاسىپتەر بويىنشا 100 ۇزدىك شەتەلدىك ماماندى تارتۋدىڭ تەتىگى كوزدەلەتىن بولادى. بۇل كاسىبي مامانداردىڭ مىندەتى ءبىلىم ترانسفەرى جانە وندىرىستە جۇمىس ىستەيتىن قازاقستاندىقتاردى دايارلاۋ بولادى.
ولار ءۇشىن تۇرۋعا ىقتيارحاتى بار «باعالى داعدىلارعا ارنالعان ۆيزا» ەنگىزىلەدى جانە قازاقستاندىق كادرلاردى وزىق دايارلاۋ ءۇشىن ۇنەمى جاڭارتىلىپ وتىراتىن باعالى داعدىلار رەيتينگى (تاپشى كاسىپتەر مەن ماماندىقتار) قالىپتاستىرىلادى.
سونداي-اق، مەملەكەت باسشىسىنىڭ تاپسىرماسىن ىسكە اسىرۋ اياسىندا جاڭا تۇجىرىمداما جوباسىندا بيزنەس-يمميگراسيا تاسىلدەرى وزگەرتىلەدى.
ەىدۇ ەلدەرىنىڭ تاجىريبەسىن نەگىزگە الا وتىرىپ، قازاقستان ەكونوميكاسىنا ءبىر مەزگىلدە 300 مىڭ اقش دوللارىن ينۆەستيسيالاعان شەتەلدىك بيزنەسمەندەر ءۇشىن ينۆەستيسيالىق جانە ىسكەرلىك ۆيزالار الۋ شارتتارىن قايتا قاراۋ ۇسىنىلادى. «ينۆەستيسيالىق ۆيزا» 10 جىلدىق تۇرۋعا رۇقسات بەرەدى. ۆيزا يەسى بيزنەستى تىركەۋگە، مۇلىككە يەلىك ەتۋگە، قارجىلىق وپەراسيالاردى جۇرگىزۋگە مۇمكىندىك الادى.
بۇل قازاقستانعا جىلىنا، اسىرەسە، كرەاتيۆتى يندۋستريانى دامىتۋ سالاسىندا 100-گە دەيىن بيزنەسمەن-ينۆەستور تارتۋدى نەعۇرلىم ناقتى ماقساتقا اينالدىرادى.
بۇدان باسقا ءبىلىم بەرۋ يمميگراسياسىن دامىتۋ ماقساتىندا تۇجىرىمدامادا مىنالار كوزدەلەتىن بولادى:
- شەتەلدىك جەتەكشى ءبىلىم بەرۋ مەكەمەلەرىن اكادەميالىق ۇتقىرلىق باعدارلاماسىنا تارتۋ جانە قوس ديپلومدى ءبىلىم بەرۋ پراكتيكاسىن ودان ءارى دامىتۋ ارقىلى ەلدىك ءبىلىم بەرۋ ينفراقۇرىلىمىن كەڭەيتۋ؛
- سۇرانىسقا يە ماماندىقتار بويىنشا 100 ۇزدىك وقىتۋشىنى جانە سۇرانىسقا يە تەحنولوگيالار بويىنشا عالىمداردى تارتۋ. بۇل رەتتە شەتەلدىك عالىمدار مەن وقىتۋشىلار ءۇشىن تۇرۋعا ىقتيارحات، ال كەيىننەن قازاقستان ازاماتتىعىن الۋ قۇقىعىن بەرە وتىرىپ، ۇزاق مەرزىمدى (10 جىلعا دەيىن) «عىلىمي-پەداگوگيكالىق ۆيزالار» كوزدەلەتىن بولادى.
وسى ستراتەگيالىق مىندەتتى ىسكە اسىرۋ ەلىمىزدىڭ جوعارى مەكتەپ پەن عىلىمنىڭ بەدەلىن، ازاماتتارىمىزدىڭ زياتكەرلىك جانە شىعارماشىلىق الەۋەتىن ارتتىرۋعا جانە، سايىپ كەلگەندە رەسپۋبليكامىزداعى ادامي كاپيتالىنىڭ يننوۆاسيالىق دامۋى ءۇشىن جاعداي جاساۋعا مۇمكىندىك بەرەدى.