قازاقستاندا 28 ماۋسىم بۇقارالىق اقپارات قۇرالدارى قىزمەتكەرلەرى كۇنى دەپ بەلگىلەنگەن. جۋرناليستەردى كاسىبي مەرەكەگە وراي مەملەكەت باسشىسى قاسىم-جومارت توقايەۆ قۇتتىقتادى.
پرەزيدەنت ب ا ق قىزمەتكەرلەرىنىڭ قوعامدىق سانانى جاڭعىرتىپ، ۇلت تۇتاستىعىن نىعايتۋدا ايرىقشا ءرول اتقاراتىنىن ءسوز ەتتى. سونداي-اق بۇقارالىق اقپارات قۇرالدارىن دامىتۋ جانە جۋرناليستەردىڭ قۇقىعىن قورعاۋ مەملەكەتتىڭ ماڭىزدى مىندەتتەرىنىڭ ءبىرى ەكەنىن اتاپ ءوتتى، دەپ حابارلايدى Almaty-akshamy.kz.
«سىزدەر قاي كەزدە دە حالىققا شىنايى ءارى جەدەل حابار تاراتىپ، كاسىبي بىلىكتىلىكتىڭ وزىق ۇلگىسىن كورسەتىپ جۇرسىزدەر. بولاشاقتا دا ەلدىك ماسەلەلەردى كوتەرىپ، ۇلتتىق قۇندىلىقتاردى ناسيحاتتاۋعا بەلسەنە اتسالىسا بەرەسىزدەر دەپ سەنەمىن»، – دەدى قاسىم-جومارت توقايەۆ.
پرەزيدەنت سونىمەن قاتار، اعا بۋىنى قالىپتاستىرعان ۇلتتىق جۋرناليستيكانىڭ باي شەجىرەسى مەن ەرەكشە قولتاڭباسى بار ەكەنىن ەسكە سالدى. مەملەكەت باسشىسى بۇل مۇرانى ساقتاۋ ماڭىزدى ەكەنىن اتاپ ءوتتى.
بۇقارالىق اقپارات قۇرالدارى قىزمەتكەرلەرى كۇنىنە وراي سالتاناتتى ءىس-شارا ءوتتى. وندا مادەنيەت جانە اقپارات ءمينيسترى ايدا بالايەۆا مەن پرەزيدەنتتىڭ كەڭەسشى-باسپاسوز حاتشىسى بەرىك ءۋالي جۋرناليستەرگە ۆەدومستۆولىق جانە مەملەكەتتىك ناگرادالار تابىس ەتتى.
«ب ا ق وكىلدەرى - قوعام مەن بيلىك اراسىنداعى التىن كوپىر. سوندىقتان وسى مەملەكەتتە تۇراتىن ءاربىر ازامات سىزدەردىڭ جۇمىستارىڭىزدى باعالايدى، ويتكەنى سىزدەر ارقىلى قوعامنىڭ كوپتەگەن وزەكتى ماسەلەلەرى ايتىلادى جانە بۇل مەملەكەتتىك ورگانداردىڭ جۇمىسىن جانداندىرىپ، جەتىلدىرۋگە ىقپال ەتەدى»، - دەپ اتاپ ءوتتى ايدا بالايەۆا.
«قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىن جۋرناليستيكا ارداگەرى قۇدايبەرگەن تۇرسىن الدى. «قۇرمەت» وردەنىمەن «ەۋرازيا» تەلەارناسىنىڭ باس ءتىلشىسى اباي بالاجان ماراپاتتالدى. سۆەتلانا پەنكوۆا «ەرەن ەڭبەگى ءۇشىن» مەدالىمەن ماراپاتتالدى. ق ر پرەزيدەنتىنىڭ العىس حاتى «Informburo.kz» ءتىلشىسى ايگەرىم ءۇمماتقا جانە باسقالارعا تابىستالدى.