قازاقستاندىق اۋە كومپانيالارى ەۋرووداقتىڭ قارا تىزىمىنە كىرمەدى
قازاقستاندا ۇشۋ قاۋىپسىزدىگى جوعارى دەڭگەيدە. حالىقارالىق ازاماتتىق اۆياسيا ۇيىمىنىڭ ماماندارى ونى 84% باعالادى. بۇل الەمدەگى ورتاشا كورسەتكىشتەن 15% جوعارى، دەپ حابارلايدى Almaty-akshamy.kz
«پاندەميا ءوز تۇزەتۋلەرىن ەنگىزدى. ءبىراق ءقازىر شەكتەۋلەر بىرتىندەپ جەڭىلدەپ جاتىر. قازاقستان ارقىلى وتەتىن جاڭا باعىتتاردىڭ داميتىنىنا سەنەمىز»، - دەيدى ق ر ييدم ازاماتتىق اۆياسيا كوميتەتىنىڭ ءتوراعاسى تالعات لاستايەۆ.
ەسكە سالا كەتەيىك، قازاقستاندىق اۋە كومپانيالارى ەۋرووداقتىڭ قارا تىزىمىندە جوق. ەلىمىزدەگى ۇشۋ قاۋىپسىزدىگى دەڭگەيىنىڭ ودان ءارى ارتۋىنا ەۋروكوميسسيانىڭ موبيلدىك جانە كولىك دەپارتامەنتى اراسىنداعى ىنتىماقتاستىعى ءوز سەپتىگىن تيگىزدى.
«ارنايى ازاماتتىق اكىمشىلىك قۇرىلىپ، بىرنەشە جىل ىشىندە جاقسى ناتيجە كورسەتە الدى. ەۋروكوميسسيا مۇشەلەرى وڭ باعاسىن بەرىپ وتىر. بىلتىر ەۋروپا ازاماتتىق اۆياسيا كونفەرەنسياسىنىڭ مۇشەسى اتاندىق. سوعان سايكەس، ەۋرووداق قازاقستاندىق اۆياكومپانيالارعا شەكتەۋ شارالارىن قولدانباۋى ءتيىس»، - دەيدى ق ر ييدم ازاماتتىق اۆياسيا كوميتەتىنىڭ ءتوراعاسى تالعات لاستايەۆ.
ازاماتتىق اۆياسيا كوميتەتى ءتوراعاسىنىڭ ايتۋىنشا، ەلىمىزدىڭ 12 اۋەجايىندا «اشىق اسپان ءتارتىبىن» ەنگىزۋ كەرەك. اۋە ايلاقتارى تەك تىكەلەي رەيستەرگە عانا ەمەس، ماسەلەن، جاپونيا نەمەسە وڭتۇستىك-شىعىس ازياعا قازاقستان ارقىلى وتەتىن ترانزيتتىك ساپارلار ءۇشىن دە جارامدى بولۋى ءتيىس. ياعني ۇشۋ قاۋىپسىزدىگىنىڭ جوعارى ستاندارتتارىنا ساي بولۋ كەرەك. ال ول ءۇشىن ەۋروپالىق سەرىكتەستەرمەن تاجىريبە الماسۋ ءوز سەپتىگىن تيگىزەرى ءسوزسىز.