بارلىق باستاۋىش سىنىپ وقۋشىلارى تەگىن ىستىق تاماقپەن قامتىلادى.
الەۋمەتتىك وسال توپتان شىققان، قيىن جاعدايداعى وتباسىلاردىڭ بالالارى بالاباقشالاردا تەگىن تاماقپەن قامتاماسىز ەتىلەدى. بۇل تۋرالى وقۋ-اعارتۋ ءمينيسترى اسحات ايماعامبەتوۆ الەۋمەتتىك جەلىدەگى پاراقشاسىندا جازدى، دەپ حابارلايدى Almaty-akshamy.kz.
«قارجىلاي قيىندىققا ۇشىراعان وتباسىلار وزدەرىنىڭ بالالارىن، قاراجاتتىڭ جەتىسپەۋشىلىگىنە بايلانىستى، كەزەككە دە قويمايدى، سايكەسىنشە، ولار بالاباقشاعا دا بارمايدى. ناتيجەسىندە بۇل بالالاردىڭ الەۋمەتتەنۋى جەتكىلىكسىز بولادى، مەكتەپتەگى ۇلگەرىمى تومەن تاۋەكەل توبىنا ءتۇسۋى بويىنشا تاۋەكەلدەر كوپ. سونداي-اق، بالالار دۇرىس تاماقتانباعاندىقتان، ولاردىڭ دەنساۋلىعىندا دا پروبلەمالار تۋىندايدى»، - دەيدى مينيستر.
پرەزيدەنتتىڭ سايلاۋالدى باعدارلاماسىندا كورسەتىلگەن بىرنەشە تارماققا توقتالىپ وتكەن ۆەدومستۆو باسشىسى بۇل ماسەلەنىڭ قالاي شەشىلەتىنىن ءمالىم ەتتى.
«بۇل ماسەلەنى شەشۋ ءۇشىن ەندى پرەزيدەنتتىڭ باعدارلاماسىنا سايكەس، وتباسىنىڭ سيفرلى كارتاسى ارقىلى قيىن جاعدايعا ۇشىراعان، الەۋمەتتىك وسال وتباسىلاردان شىققان بالالاردى انىقتاۋ الگوريتمى ەنگىزىلىپ، ولار بالاباقشالاردا تەگىن تاماقپەن قامتاماسىز ەتىلەدى. پرەزيدەنتتىڭ بۇل يگى باستاماسى بىرنەشە ءجۇز مىڭ بالاعا بالاباقشاعا بارۋعا، ولاردى الەۋمەتتەندىرۋگە، دەنساۋلىعىن جاقسارتۋعا، بولاشاقتا وقۋ ۇلگەرىمىن جوعارىلاتۋعا مۇمكىندىك بەرەدى»، - دەپ جازدى ول.
سونداي-اق، ءمينيستردىڭ ايتۋىنشا بارلىق باستاۋىش سىنىپ وقۋشىلارى تەگىن ىستىق تاماقپەن قامتىلادى.
«بۇگىنگى تاڭدا 7 وبلىستا 1-4-سىنىپتاردىڭ وقۋشىسىنا تەگىن ىستىق تاماق بەرىلەدى. ەندى مەملەكەت باسشىسىنىڭ 2029 جىلعا دەيىنگى سايلاۋالدى باعدارلاماسى اياسىندا 1-4-سىنىپ وقۋشىلارىن 100% مەكتەپ تاماعىمەن قامتۋ جوسپارلانىپ وتىر. پرەزيدەنتتىڭ بۇل باستاماسى ءوز كەزەگىندە بالالاردىڭ دەنساۋلىعىنا، جاقسى دامۋىنا، وقۋ ۇلگەرىمىن جانە ءال-اۋقاتىن جاقسارتۋىنا وڭ اسەر ەتەتىنى ءسوزسىز. كوپتەگەن زەرتتەۋ وسىنداي شەشىمدەردىڭ پايدالى ەكەنىن كورسەتىپ وتىر»، - دەيدى اسحات ايماعامبەتوۆ.