قازاقستاندا ءتورت "جاسىل" ەلەكتر ستانسا سالىنادى

قازاقستاندا ءتورت "جاسىل" ەلەكتر ستانسا سالىنادى، - دەپ حابارلايدى aqshamnews.kz ءتىلشىسى. 

ءماجىلىس 2024 جىلعى 12 قاراشادا باكۋ قالاسىندا قول قويىلعان قازاقستان رەسپۋبليكاسىنىڭ ۇكىمەتى مەن جۇڭگو حالىق رەسپۋبليكاسىنىڭ ۇكىمەتى اراسىنداعى جاڭارتىلاتىن ەنەرگيا كوزدەرى (جەك) سالاسىنداعى جوبالاردى ىسكە اسىرۋ تۋرالى كەلىسىمدى راتيفيكاسيالادى.

قۇجات اياسىندا تاراپتار جاھاندىق جىلىنۋمەن كۇرەسۋ ماقساتىندا قازاقستان رەسپۋبليكاسىنىڭ اۋماعىندا جاڭارتىلاتىن ەنەرگيا كوزدەرى مەن تۇراقتى دامۋ سالاسىنداعى جوبالاردى ىلگەرىلەتۋ، ازىرلەۋ جانە جۇزەگە اسىرۋ ءۇشىن كۇش بىرىكتىرەدى.

كەلىسىمگە سايكەس جيىنتىق قۋاتى 1،5 گۆت بولاتىن ءۇش جەل ەلەكتر ستانسياسى/ستانساسى جانە قۋاتى 0،3 گۆت بولاتىن ءبىر كۇن ەلەكتر ستانسياسى سالىنادى. جوبالار قاراعاندى، تۇركىستان جانە پاۆلودار وبلىستارىندا ىسكە اسىرىلاتىن بولادى.

ناتيجەسىندە 100-دەن استام تۇراقتى جانە شامامەن 1500 ۋاقىتشا جۇمىس ورنى اشىلادى، 2 ملرد اقش دوللارىنان استام ينۆەستيسيا تارتىلادى، سونداي-اق جىل سايىن 5،7 ملرد كۆت/ساعاتتان استام "جاسىل" ەلەكتر ەنەرگياسى وندىرىلەدى. قازاقستان تاراپىنان بىرلەسكەن ينۆەستور رەتىندە "سامۇرىق-ەنەرگو" اكسيونەرلىك قوعامى قاتىسادى.

بۇل جوبالاردى جۇزەگە اسىرۋ جاڭارتىلاتىن ەنەرگيا كوزدەرىنىڭ ۇلەسى بويىنشا ينديكاتيۆتىك كورسەتكىشتەردى (ونىڭ ىشىندە 2030 جىلعا قاراي 15%-عا جەتۋ ماقساتى) ورىنداۋدى قامتاماسىز ەتىپ، ۇلتتىق ستراتەگيالىق قۇجاتتاردا بەكىتىلگەن قازاقستان رەسپۋبليكاسىنىڭ كومىرتەكتى بەيتاراپتىق ماقساتىنا قول جەتكىزۋگە ەلەۋلى ۇلەس قوسادى.