وتكەن جىلدىڭ العاشقى ءۇش توقسانىندا قازاقستاندا سابىن، تازالاۋ، جۋۋ، پارفيۋمەريا جانە كوسمەتيكالىق قۇرالدار ءوندىرىسى 17،3 ميلليارد تەڭگەنى قۇراعان. بۇل كورسەتكىش 2022 جىلدىڭ سايكەس كەزەڭىمەن سالىستىرعاندا 0،9%-عا وسكەن، دەپ حابارلايدى aqshamnews.kz.
كوستاناي وبلىسى تازالاۋ جانە كوسمەتيكالىق قۇرالداردى ەڭ كوپ وندىرگەن ءوڭىر بولىپ تابىلادى، مۇنداعى ءوندىرىس كولەمى 4،7 ميلليارد تەڭگەگە جەتىپ، جىلدىق ءوسىم 18،3%-دى قۇراعان. الدىڭعى بەس وڭىرگە استانا (3 ميلليارد تەڭگە)، شىمكەنت (2،7 ميلليارد تەڭگە)، الماتى (2،6 ميلليارد تەڭگە) جانە الماتى وبلىسى (1،2 ميلليارد تەڭگە) كىرەدى.
قازاقستاندىق وندىرۋشىلەردىڭ وتاندىق نارىقتى قامتاماسىز ەتۋ دەڭگەيى كوڭىل كونشىتپەيدى. ماسەلەن، ەلىمىزدەگى ءتىس پاستالارى نارىعى تولىعىمەن يمپورتقا تاۋەلدى. 2023 جىلدىڭ قاڭتار-تامىز ايلارىندا قازاقستانعا 4 مىڭ توننا ءتىس پاستاسى مەن پوروشوكتار اكەلىنسە، وتاندىق ءوندىرىس – ءنول. ورتالىق گيگيەنا قۇرالدارىنىڭ جالپى كولەمى 4،6 مىڭ توننا سىرتتان كەلسە، ەلىمىزدە تەك 17 توننا وندىرىلگەن. دەمەك، بۇل سۇرانىستىڭ 0،4%-ى عانا قامتاماسىز ەتىلدى دەگەندى بىلدىرەدى.
تۇرمىستىق تازالاۋ پاستالارى مەن پوروشوكتار بويىنشا وتاندىق كومپانيالاردىڭ ۇلەسى بار بولعانى 0،01 پايىزدى قۇرايدى. ال شامپۋندەر مەن شاش لاكتارى – 2،7%، پارفيۋمەريا مەن كوسمەتيكا – 7،2%، جۋۋ قۇرالدارى – 9،4% قامتاماسىز ەتە الادى. تەك سابىن وندىرىسىندە سۇرانىس 29،5%-عا، ال شاش الۋعا ارنالعان قۇرالدار، دەزودورانتتار جانە باسقا دا تاۋارلار بويىنشا 40،5%-عا جابىلدى. جالپى، قازىرگى جاعداي بويىنشا بۇل جاعىنان كوشتىڭ ارتىنا قالىپ كەلە جاتقانىمىزدى جاسىرا المايمىز.
سونىمەن جوعارىداعى قورىتىندىلارعا قاراپ، قازاقستان تازالاۋ جانە كوسمەتيكالىق قۇرالدار ءوندىرىسى ءالى دە كەنجەلەپ، سىرتقا قول جايىپ وتىرعانىمىز اششى دا بولسا شىندىق. ال ءبىز تولىعىمەن ءوز ءونىمىمىزدى پايدالاناتىن ەلگە اينالۋ ءۇشىن وندىرۋشىلەرگە ناقتى شارالار مەن ستراتەگيالار قاجەت.
ەستەرىڭىزگە سالا كەتەيىك، بۇعان دەيىن ەلىمىزدەگى ەتپەن قامتاماسىز ماسەلەسى توڭىرەگىندە جازعان بولاتىنبىز.