قازاقستاندا شوكولاد پەن تاتتىلەردى تۇتىنۋ كورسەتكىشى تومەندەپ جاتىر، - دەپ حابارلايدى Aqshamnews.kz.
2025 جىلدىڭ ءۇشىنشى توقسانىندا قازاقستان تۇرعىندارى شوكولاد تۇتىنۋدى كۇرت ازايتتى. ءبىر ادامعا شاققاندا بار بولعانى 195 گرامم شوكولاد تۇتىنىلعان. بۇل ەكىنشى توقسانمەن سالىستىرعاندا 21%-عا، ال وتكەن جىلمەن سالىستىرعاندا 24%-عا از، دەپ حابارلايدى DataHub.
ساراپشىلاردىڭ ايتۋىنشا، بۇل كورسەتكىش سوڭعى ءۇش جىلداعى ەڭ تومەنگى دەڭگەيگە جەتكەن، الايدا ءابسوليۋتتى رەكورد ەمەس. وسىنداي كولەم 2011 جىلدان 2019 جىلدىڭ ورتاسىنا دەيىن قالىپتى جاعداي بولعان. ال شوكولادپەن قاپتالعان كامپيتتەرگە كەلسەك، مۇنداعى جاعداي وزگەشە: ولاردىڭ تۇتىنۋى باقىلاۋ جۇرگىزىلە باستاعان ۋاقىتتان بەرگى ەڭ تومەنگى دەڭگەيگە ءتۇستى. ءۇشىنشى توقساندا قازاقستاندىقتار ءبىر ادامعا شاققاندا 586 گرامم عانا تۇتىنعان، بۇل وتكەن توقسانمەن جانە وتكەن جىلمەن سالىستىرعاندا 7%-عا از.
"ايتا كەتۋ كەرەك، ءتاتتى ونىمدەردىڭ ءوزى ايتارلىقتاي قىمباتتاپ جاتىر. ماسەلەن، قاراستىرىلىپ وتىرعان III توقساننىڭ سوڭىندا، ياعني قىركۇيەك ايىندا، شوكولادتىڭ باعاسى جىلدىق ەسەپپەن ۇشتەن بىرىنەن استامعا ءوستى. ال شوكولادپەن قاپتالعان كامپيتتەر سالىستىرمالى تۇردە از – شامامەن 15%-عا قىمباتتادى"، – دەپ اتاپ ءوتتى ساراپشىلار.
ولاردىڭ ايتۋىنشا، شوكولاد باعاسىنىڭ ءوسۋى الەمدىك دەڭگەيدە بايقالىپ وتىر. بۇعان كاكاو-بۇرشاقتارىنىڭ تاپشىلىعى سەبەپ. 2024 جىلى نەگىزگى ءوندىرۋشى ەلدەردەگى ءونىمنىڭ ازايۋىنا بايلانىستى كاكاو باعاسى كۇرت كوتەرىلىپ، 2025 جىلى دا جوعارى دەڭگەيدە ساقتالۋدا.
"سوڭعى ايلاردا باعالار قايتادان تومەندەي باستاعانىمەن، ءوندىرىستىڭ بەلگىلى ءبىر گەوگرافيالىق ايماقتاردا شوعىرلانۋىنا بايلانىستى جۇيەلى تاۋەكەلدەر ءالى دە ساقتالىپ وتىر"، – دەپ ەسەپتەيدى ساراپشىلار.