قازاقستاندا شەتەلدىك ستۋدەنتتەر سانى ۇدايى ءوسىپ كەلەدى. 2024/2025 وقۋ جىلىندا ەلىمىزدە 28،5 مىڭ شەتەلدىك ستۋدەنت ءبىلىم الۋدا، بۇل وتكەن جىلمەن سالىستىرعاندا 12،8%-عا كوپ. بۇل كورسەتكىش قازاقستاننىڭ جوعارى وقۋ ورىندارىنىڭ حالىقارالىق دەڭگەيدە تانىلىپ، ءبىلىم بەرۋ جۇيەسىنىڭ تارتىمدىلىعىن ارتتىرۋدا، دەپ حابارلايدى aqshamnews.kz
شەتەلدىك ستۋدەنتتەردىڭ قۇرامىندا ءتۇرلى ەلدەردەن كەلگەن جاستار بار. ولاردىڭ جارتىسىنان كوبى الىس شەتەلدەردەن كەلگەندەر، ەڭ كوپ سانى – 9،3 مىڭ ادام، ولار ينديادان. ال، تمد ەلدەرىنەن كەلگەن ستۋدەنتتەر سانى شامامەن جارتىسىن قۇرايدى. ەكىنشى ورىندا – وزبەكستان ازاماتتارى (4،6 مىڭ ادام)، ءۇشىنشى ورىندا – تۇركىمەنستاننان كەلگەندەر (4،4 مىڭ ادام).
قازاقستاننىڭ جوعارى وقۋ ورىندارىنداعى جالپى ستۋدەنتتەر سانى دا وسۋدە. 2024/2025 وقۋ جىلىندا ەلىمىزدىڭ جوعارى وقۋ ورىندارىندا 624،5 مىڭ ستۋدەنت ءبىلىم الۋدا، بۇل وتكەن جىلمەن سالىستىرعاندا 5،4%-عا كوپ. الماتى قالاسى ەلىمىزدەگى باستى ءبىلىم بەرۋ ورتالىعى بولىپ قالىپتاسىپ كەلەدى، مۇندا ستۋدەنتتەردىڭ ۇشتەن ءبىرى ءبىلىم الۋدا – 202 مىڭنان استام ستۋدەنت. الماتى ۋنيۆەرسيتەتتەرىنىڭ ۇلەسى جىل سايىن ارتىپ كەلەدى: 2019 جىلى ول 26،9%-دى قۇراسا، قازىرگى تاڭدا 32،3%-عا جەتكەن.
الداعى ۋاقىتتا الماتى مەن ونىڭ اينالاسىنداعى جاڭا «اقىلدى» مەگاپوليس الاتاۋ ايماعى ءبىلىم بەرۋ حابىنا اينالۋى مۇمكىن. بۇل تەك ءبىلىم بەرۋ سالاسىندا عانا ەمەس، جالپى ەكونوميكا مەن ينفراقۇرىلىمنىڭ دامۋىنا دا وڭ اسەرىن تيگىزەدى. شەتەلدىك ستۋدەنتتەر ەلىمىزدىڭ ەكونوميكالىق دامۋىندا ماڭىزدى ءرول اتقارادى. ولار ءبىلىم الۋ بارىسىندا ەلىمىزدىڭ ەكونوميكاسىنا ينۆەستيسيالار اكەلەدى، سونداي-اق ۋنيۆەرسيتەتتەر اينالاسىندا قالىپتاساتىن ەكوجۇيە ارقىلى ساۋدا، مادەنيەت جانە تۋريزم سالالارى داميدى.
بۇل ءۇردىس قازاقستاننىڭ حالىقارالىق ءبىلىم بەرۋ نارىعىندا ماڭىزدى ورىن الۋىنا ىقپال ەتەدى جانە بولاشاقتا جاڭا ەكونوميكالىق ءوسۋ نۇكتەلەرىنىڭ ءبىرى بولۋى مۇمكىن.