قازاقستاندا «قىزمەتكەردىڭ جەكە ءىسى» سەرۆيسى ىسكە قوسىلدى

 ەلىمىزدىڭ ەڭبەك رەسۋرستارى پورتالىندا وسىنداي اتاۋمەن جاڭا سەرۆيس ىسكە قوسىلدى.

بۇل جۇيەنىڭ كومەگىمەن جۇمىس بەرۋشى  قىزمەتكەردىڭ جۇمىسقا ورنالاسۋ كەزىندە قاجەتتى قۇجاتتاردىڭ ەلەكتروندىق پاكەتىن سۇراي الادى. اتاپ ايتساق: جەكە كۋالىكتەگى اقپارات، ءبىلىمى تۋرالى، پسيحوناركولوگيالىق جانە تۋبەركۋلەز ديسپانسەرلەرىندە ەسەپتە بار-جوعى، ءتىپتى ۆاكسينالاۋ جايىنداعى مالىمەتتەر قامتىلعان، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.

سونداي-اق، ۇمىتكەردىڭ باسقا جۇمىسپەن قامتىلۋىن تەكسەرۋگە بولادى. ارينە، ونىڭ ءبارى تەك يەسىنىڭ رۇقساتىمەن بەرىلەدى. سۇراۋ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ دەربەس دەرەكتەرگە قولجەتىمدىلىكتى باقىلاۋ سەرۆيسى ارقىلى SMS جولداۋ نەمەسە ەلەكتروندىق سيفرلىق قولدىڭ كومەگىمەن جۇزەگە اسىرىلادى.

«ادامدار وزدەرىنىڭ جەكە دەرەكتەرىنىڭ قاۋىپسىزدىگى بويىنشا ەش الاڭداماسا بولادى. مالىمەتتەر ەڭبەك شارتتارىن ەسەپكە الۋعا ارنالعان ءبىرىڭعاي جۇيەدە ساقتالادى. ول ءوز كەزەگىندە مەملەكەتتىك ورگانداردىڭ ءبىرىڭعاي دەرەكتەر بازاسىنا ەنەدى. ول  اقپاراتتىق قاۋىپسىزدىككە قاتىستى سىناقتان وتكەن. ونى راستايتىن سەرتيفيكاتتار بار»، - دەيدى ق ر ەحاقم «ەڭبەك رەسۋرستارىن دامىتۋ ورتالىعى» اق باس ساراپشىسى ەربولات يسلاموۆ.

جاقىندا ەلىمىزدە قۇرىلعان وسى تەكتى ەندى ءبىر جۇيە -  «قىزمەتكەردىڭ جەكە كابينەتى». وندا ەل ازاماتتارى ەڭبەك شارتتارىمەن تانىسىپ، جۇمىس ورنىنان انىقتامانى جۇكتەپ، دەربەس دەرەكتەردى وڭدەۋگە كەلىسىمگە قول قويا الادى.