قازاقستاندا قۇرىلىس كودەكسى دايىندالىپ جاتىر

وسى ايدا ونىڭ جوباسى قوعام تالقىسىنا تۇسەدى.

بۇل تۋرالى يندۋستريا جانە ينفراقۇرىلىمدىق دامۋ ءمينيسترىنىڭ مىندەتىن اتقارۋشى مارات قارابايەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«قۇرىلىس كودەكسىن ازىرلەۋ ماقساتىندا جۇمىس توبى قۇرىلىپ، جول كارتاسى بەكىتىلدى. سالالىق قاۋىمداستىقتار مەن ينستيتۋتتاردىڭ قاتىسۋىمەن كودەكستىڭ العاشقى جوباسى ازىرلەندى. قاتىسقاندار قاتارىندا مەملەكەتتىك قالا قۇرىلىسى كاداسترى، مەملەكەتتىك ساراپتاما رەسپۋبليكالىق مەكەمەسى، قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتى، قازاقستاننىڭ تۇرعىن ءۇي كوممۋنالدىق شارۋاشىلىق ورتالىعىنىڭ وكىلدەرى بار»، - دەدى مارات قارابايەۆ ۇكىمەت وتىرىسىندا.

ونىڭ ايتۋىنشا، قۇرىلىس كودەكسىنىڭ جوباسى وسى ايدا قوعامدىق تالقىعا شىعارىلادى.

«بيىل جىل سوڭىنا دەيىن اتالعان جوبانى ءماجىلىستىڭ قاراۋىنا ەنگىزۋ جوسپارلانىپ وتىر. تۇتاستاي العاندا، قۇرىلىس كودەكسى 4 زاڭدى بىرىكتىرەدى. ولار - "ساۋلەت، قالا قۇرىلىسى جانە قۇرىلىس قىزمەتى تۋرالى"، "تۇرعىن ءۇي قۇرىلىسىنداعى ۇلەستىك قاتىسۋ تۋرالى"، "جەكە تۇرعىن ءۇي قۇرىلىسى تۋرالى" جانە "اكىمشىلىك-اۋماقتىق قۇرىلىس تۋرالى" زاڭدار. وسىلايشا قۇرىلىس پروسەسىنىڭ سيكلىن جوسپارلاۋدان پايدالانۋعا دەيىن تولىق قامتيدى»، - دەيدى يندۋستريا ءمينيسترىنىڭ مىندەتىن اتقارۋشى.