جىل باسىنان بەرى قازاقستانعا ءۇش ميلليونعا جۋىق رەسەيلىك كەلدى
ق ر ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ قازاقستان اۋماعىندا جۇرگەن رەسەيلىكتەر تۋرالى مالىمەت بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جىل باسىنان بەرى قازاقستانعا ءۇش ميلليونعا جۋىق رەسەيلىك كەلدى، ەل اۋماعىنان شىققاندار سانى دا شامامەن بىردەي بولدى. رەسەيدە ءىشىنارا موبيليزاسيا جاريالانعالى ەلىمىزگە 837 مىڭ رەسەيلىك كەلدى، 780 مىڭ ادام قايتا كەتتى. قازىرگى ۋاقىتتا ەلىمىزدە 298 مىڭ رەسەيلىك بار، ونىڭ 30 مىڭى ەڭبەك بيرجاسىندا تىركەلگەن شارتتارعا سايكەس جۇمىس ىستەيدى»، - دەدى ءىلياس يسپانوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
سپيكەردىڭ ايتۋىنشا، ولار ۋاقىتشا تۇرۋ ءۇشىن تىركەۋدەن وتكەن.
«قازاقستاندا ءبىلىم الىپ جاتقان 20 مىڭعا جۋىق ستۋدەنت بار، سونداي-اق بىزگە كەلىپ، ترانزيتپەن ۇشاتىن ادامدار بار. 21 قىركۇيەكتەن باستاپ 198 مىڭ رەسەيلىك ەلىمىزدى ترانزيتتىك ەل رەتىندە پايدالاندى جانە ولار جوسپارلاعان ەلگە كەتتى»، - دەپ تولىقتىردى ءى. يسپانوۆ.