2026 جىلعا دەيىن قازاقستاندا 370-كە جۋىق مەكتەپ سالىنادى، دەپ حابارلايدى Almaty-akshamy.kz.
«جايلى مەكتەپ» ءبىلىم بەرۋ سالاسىنداعى ۇلتتىق جوباسى اياسىندا 2026 جىلعا دەيىن قالالاردا جانە قارقىندى دامىپ كەلە جاتقان ەلدى مەكەندەردە وقۋشى ورىندارىنىڭ اعىمداعى جانە بولجامدى تاپشىلىعىن جابۋ ءۇشىن 740 مىڭ وقۋشىعا ارنالعان 369 مەكتەپ پايدالانۋعا بەرىلەدى»، - دەلىنگەن وقۋ-اعارتۋ مينيسترلىگىنىڭ مالىمەتىندە.
اتاپ ايتقاندا، 2023 جىلى ەكى اۋىسىمدا 461 مىڭ وقۋشى ورىنعا 217 مەكتەپتىڭ قۇرىلىسىن باستاپ، 2024 جىلى پايدالانۋعا بەرۋ جوسپارلانعان. ال 2024 جىلى ەكى اۋىسىمدا 279 مىڭ ورىنعا 152 مەكتەپتىڭ قۇرىلىسىن باستاپ 2025 جىلى تاپسىرۋ ەسكەرىلگەن..
بۇدان بۇرىن حابارلانعانداي، جايلى مەكتەپتەردە ەلەكتروندى كىتاپحانا بولادى.
بۇعان دەيىن «جايلى مەكتەپ» جوباسىن جۇزەگە اسىرۋعا 2،6 ترلن تەڭگە بولىنەتىنى حابارلانعان بولاتىن. ەڭ كوپ «جايلى مەكتەپتەر» الماتى، تۇركىستان، ماڭعىستاۋ وبلىستارىندا، شىمكەنت، استانا جانە الماتى قالالارىندا سالىنادى. قالعان مەكتەپتەر شاعىن قالالاردى قوسا العاندا، تۇتاس قازاقستان بويىنشا بىركەلكى بولىنەدى.