بىرنەشە جاڭاشىلدىقتاردى ىسكە اسىرۋ كوزدەلىپ وتىر.
«اشىق نقا» پورتالىندا «پروكۋراتۋرا تۋرالى» ق ر كونستيتۋسيالىق زاڭىنىڭ جوباسى تۋرالى رەتتەۋشىلىك ساياساتتىڭ كونسۋلتاتيۆتىك قۇجاتى جاريالاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«پروكۋراتۋرا ورگاندارىنىڭ مارتەبەسىن نىعايتۋ جونىندەگى ۇسىنىمدار ەۋروپالىق پروكۋرورلاردىڭ كونسۋلتاتيۆتىك كەڭەسىنىڭ قۇجاتتارىندا دا بار. كەڭەس قورىتىندىسىنىڭ 13-تارماعىندا پروكۋرورلاردىڭ تاۋەلسىزدىگى، ەسەپتىلىگى جانە ەتيكاسى ۇلتتىق زاڭنامادا نەمەسە ءتىپتى ەلدىڭ كونستيتۋسيالارىندا كوزدەلگەن پروكۋرورلار ستاتۋسىنا ەنگىزىلگەن ۇعىمدار بولۋى ءتيىس دەپ كوزدەلگەن»، - دەپ جازىلعان كونسۋلتاتيۆتىك قۇجاتتا.
سونداي-اق قۇجات ماتىنىندە ەكونوميكالىق ىنتىماقتاستىق جانە دامۋ ۇيىمىنىڭ قازاقستانعا كونستيتۋسياسدا پروكۋراتۋرا ورگاندارىنىڭ مارتەبەسىن ايقىنداۋ جانە پروكۋرورلاردى ولاردىڭ قىزمەتىنە زاڭسىز ارالاسۋدان قورعاۋ، ولاردىڭ دەربەستىگىنە، ونىڭ ىشىندە قارجىلاندىرۋ تۇرعىسىنان كەپىلدىك بەرۋدى ۇسىنعانى ايتىلادى.
ناقتىراق ايتساق، «سۋديالار مەن پروكۋرورلار مىندەتتەرىنىڭ تابيعاتىنىڭ جاقىندىعى مەن ءوزارا تولىقتىرىلۋىن، سونداي-اق ولاردىڭ مارتەبەسى مەن قىزمەت ەتۋ جاعدايلارىنا قاتىستى تالاپتاردى ەسكەرە وتىرىپ، پروكۋرورلاردىڭ سۋديالار ءۇشىن كوزدەلگەن كەپىلدىكتەرگە ۇقساس كەپىلدىكتەرى بولۋعا ءتيىس»، -دەپ جازىلعان.
ال بىرىككەن ۇلتتار ۇيىمى قازاقستانعا تەرگەۋ كەزىندەگى ازاپتاۋ فاكتىلەرىن تەكسەرۋدى پروكۋراتۋرا ورگاندارىنا بەرۋ تۋرالى ۇسىنىستى تالايدان بەرى ايتىپ ءجۇر. قۇجاتتا بۇل ۇسىنىس تا ەسكەرىلگەن. وسى جانە وزگە دە ۇسىنىستار مەن حالىقارالىق تاجىريبەلەردى ەسكەرە وتىرىپ، بىرنەشە جاڭاشىلدىقتاردى ىسكە اسىرۋ كوزدەلىپ وتىر. ولار:
- قاداعالاۋدىڭ ءاربىر باعىتى بويىنشا پروكۋروردىڭ وكىلەتتىكتەرىن قايتا قاراۋ؛
- پروكۋراتۋرا ورگاندارىنىڭ قۇقىق قورعاۋ ينستيتۋتتارىمەن (ادام قۇقىقتارى جونىندەگى ۋاكىل)، سونداي-اق جۇرتشىلىقپەن (ب ا ق، ۇات جانە ت. ب.) ءوزارا ءىس-قيمىلىن كۇشەيتۋ؛
-ازاپتاۋ جانە باسقا دا قاتىگەز، ادامگەرشىلىككە جاتپايتىن نەمەسە ار-نامىستى قورلايتىن ىس-ارەكەتتەر مەن جازالاۋ تۇرلەرىن تەرگەۋ بويىنشا فۋنكسيالاردى پروكۋراتۋرا ورگاندارىنا بەرۋ؛
پروكۋراتۋرا قىزمەتىنىڭ قۇقىقتىق كەپىلدىكتەرىن كۇشەيتۋ.
قۇجات قوعامدىق تالقىلاۋعا16 مامىرعا دەيىن ۇسىنىلادى.
ەسكە سالساق، پرەزيدەنت حالىققا بيىلعى جولداۋىندا ازاپتاۋعا بايلانىستى قىلمىستاردى باس پروكۋراتۋراعا جۇكتەۋدى ۇسىنعان ەدى.