فيلم قالىڭ جۇرتشىلىقتىڭ نازارىنا بيىل 21 ساۋىردە ۇسىنىلماق
وتاندىق كينوتۋىندىنىڭ قاتارى تاعى ءبىر فيلممەن تولىقپاق. بيىل ساۋىردە «پاراليمپيەس» ءفيلمى جارىققا شىعادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ششۋچينسكىدە «پاراليمپيەس» ءفيلمىنىڭ جابىق كورسەتىلىمى ءوتتى. ايتۋلى شاراعا ق ر مادەنيەت جانە سپورت ءمينيسترى داۋرەن ابايەۆ قاتىستى.
«پاراسپورتشىلار تۋرالى فيلم ءتۇسىرۋ يدەياسى 2018 جىلى كورەيادا وتكەن پاراليمپيادا ويىندارىنان كەيىن كەلدى. بەلگىلى بولعانداي پاراليمپياداشىلارعا اسا ءمان بەرىلمەيتىنى بايقالدى. پاراليمپياداشىلاردىڭ تاعدىرى مەن سپورتتاعى ەڭبەكتەرى تۋرالى قوعامنىڭ حابارى از. بۇل ماسەلە مەنى بەي-جاي قالدىرمادى. فيلم سيۋجەتى شىنايى ومىردەن الىنعان. الدىمەن پاراليمپياداشىلارمەن كەڭەسىپ، اقپارات جينادىق. موتيۆاسيالىق فيلم. جالپى قازىرگى وتاندىق فيلمدەردىڭ دەنى كومەديا جانرىنا جاتادى. وسى تۇرعىدا ءبىز ومىرلىك ءمانى بار، ادامدارعا ەرىك-جىگەر بەرەتىن تۋىندى جاساعىمىز كەلدى»، - دەدى فيلم رەجيسسەرى الديار بايراكيموۆ.
ونىڭ ايتۋىنشا، اتالعان فيلمدە بىرنەشە كينو جانرىنان ءۇزىندى بار. ونىڭ ىشىندە دراما، ەكشن، كومەديا جانە تاعى باسقا.
«پاراسپورتشىلار وتە جىگەرلى ادامدار. ءار پاراسپورتشىنىڭ ءوز تاريحى بار. ءفيلمدى ءتۇسىرۋ بارىسىندا ءبىز تىكەلەي كاسىبي پاراليمپياداشىلارمەن جۇمىس ىستەدىك. «پاراليمپيەس» قازاقستاندا پاراليمپياداشىلار تۋرالى تۇسىرىلگەن العاشقى فيلم. تاعى ءبىر جايت، كوپشىلىك ءۇشىن دەرەكتى فيلم ەمەس، كوركەم تۋىندى ەتۋگە تىرىستىق»، - دەيدى ول.
فيلمدەگى باستى ءرولدى جاس اكتەر اسقار ءىلياسوۆ سومدايدى. ءتۇسىرىلىم الماتى جانە ششۋچينسك قالاسىنداعى قىسقى سپورت نىساندارىندا ءوتتى.
ال قالىڭ جۇرتشىلىقتىڭ نازارىنا بيىل 21 ساۋىردە ۇسىنىلماق.
«جوسپار قۇرعاندا باستى رولگە ءارتىس ەمەس شىنايى پاراسپورتشىنى ءتۇسىرۋدى ويلادىق. ءسويتىپ 3 كاستينگ وتكىزدىك. ناتيجەسىندە كاسىبي ءارتىستىڭ كەرەكتىگىن تۇسىندىك. سەبەبى باستى ءرولدى سومداۋ وڭاي ەمەس جانە پاراسپورتشىعا قيىنعا سوعاتىن بولدى. دەگەنمەن ءفيلمنىڭ ىشىندە ناعىز پاراليمپياداشىلار دا بار»، - دەدى فيلم اۆتورى.
ودان بولەك، رەجيسسەر الداعى ۋاقىتتا «پاراليمپيەس» ءفيلمىن كينو سالاسىنداعى حالىقارالىق بايقاۋلارعا قاتىستىرىپ، باعىن سىنايتىنىن ايتتى.