پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا قازاقستانداعى وتباسىلاردىڭ اجىراسۋ كورسەتكىشى كوبەيىپ كەتكەنىن مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ۆەدومستۆو الەۋمەتتىك جەلىدەگى پاراقشاسىندا نەكەنىڭ ەڭ ءقاۋىپتى كەزەڭىن دە اتاعان.
«جاسىراتىنى جوق، قازاقستاندا نەكەگە تۇرۋ سانى ازايىپ، اجىراسۋلار بىرتىندەپ كوبەيىپ كەلەدى. بۇل اقپارات قازاقستاندىق قوعامدىق دامۋ ينستيتۋتى (ققدي) جۇرگىزگەن «قازاق وتباسى-2020» ۇلتتىق بايانداماسىندا جيناقتالعان. ساراپشىلاردىڭ پىكىرىنشە، ەرلى-زايىپتىلار ءۇشىن ەڭ قيىنى نەكەنىڭ ءبىرىنشى ونجىلدىعى ەكەن (بۇل بارلىق اجىراسۋلاردىڭ جالپى سانىنان 61،5%-ىنا جەتكەن). سونىمەن قاتار، نەكەگە تۇرۋدىڭ العاشقى ءتورت جىلى بارلىق اجىراسۋلاردىڭ ۇشتەن ءبىرىن قۇرايدى»، - دەپ جازدى ۇلتتىق كوميسسيادان.
جازبادا اجىراسۋلاردىڭ 30%-عا جۋىعى نەكەنىڭ بەسىنشى جانە ونىنشى جىلدارىندا بولاتىندىعى ايتىلعان. ون جىلدىق نەكەدەن كەيىن اجىراسۋ ىقتيمالدىعى 20 جىلدىق كەزەڭگە دەيىن كۇرت تومەندەيدى. ەسەسىنە، جيىرما جىلدىق نەكەدەن كەيىن اجىراسقان وتباسىلار سانى قايتادان وسەدى: بۇل اجىراسۋلاردىڭ جالپى ۇلەسىنىڭ 13،7 %-ىن قۇرايدى.
«ققدي ساراپشىلارىنىڭ ايتۋىنشا، جيىرما جىلدىق نەكەدەن كەيىن اجىراسۋدىڭ ءوسۋى «بوس ۇيا» كەزەڭىن كورسەتەدى، ياعني بالالار ءوسىپ، وتباسىن تاستاپ كەتكەن. سودان كەيىن جيناقتالعان رەنىش، ءوزارا شارشاۋ جانە باسقا دا فاكتورلار ەرلى-زايىپتىلاردىڭ ودان ءارى بىرگە ءومىر سۇرۋىنە ءبىرشاما كەدەرگى كەلتىرەدى. سونىمەن قاتار، ساراپشىلار بۇل جاستا نەكەنىڭ بۇزىلۋىنا جاناما تۇردە ءومىر ءسۇرۋ دەڭگەيىنىڭ ايتارلىقتاي جوعارى بولاتىندىعى اسەر ەتەدى دەپ سانايدى. ويتكەنى بۇرىنعى ەرلى-زايىپتىلاردىڭ ءبىر-بىرىنسىز ەركىن ءجۇرىپ-تۇرۋىنا مۇمكىندىگى بار»، - دەلىنگەن جاريالانىمدا.