جويۋ جۇمىستارى بيىلعى قاراشا ايىنىڭ سوڭىنا دەيىن جالعاسادى.
قازاقستاندىق ماماندار ءوق-دارى قويمالارىندا بولعان وقيعالاردىڭ سالدارىن جويۋ جۇمىستارىن جانداندىراتىن بولدى، دەپ حابارلايدى Almaty-akshamy.kz.
«قارۋلى كۇشتەردىڭ ينجەنەرلىك-ساپەرلىك بولىمشەلەرى بيىلعى جىلدىڭ 28 ناۋرىزىنان باستاپ ارىستاعى جانە جامبىل وبلىسىنىڭ بايزاق اۋدانىنداعى ءوق-دارى قويمالارىندا ورىن العان وقيعالاردىڭ سالدارىن جويۋ جۇمىستارىنا كىرىسەدى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
اتالعان شارالار «ءقاۋىپسىز ەل» ۇلتتىق جوباسىن جانە مەملەكەت باسشىسى قاسىم-جومارت توقايەۆتىڭ وق-دارىلەردى ءقاۋىپسىز ساقتاۋدى قامتاماسىز ەتۋ جونىندەگى تاپسىرمالارىن ىسكە اسىرۋ شەڭبەرىندە جۇرگىزىلەدى.
ارىس قالاسىندا جارۋ جولىمەن جويىلاتىن ءوق-دارى قالدىقتارى قويمالاردىڭ تەحنيكالىق اۋماعىنان ارنايى جابدىقتالعان پوليگونعا جەتكىزىلەدى.
جامبىل وبلىسىنداعى ينجەنەرلىك ءوق-دارى قويماسىنىڭ اۋماعىندا ءوق-دارى قالدىقتارىن جويۋعا ارنالعان ورىن جابدىقتالعان. ال قالعان بولىگى ارنايى پوليگوندارعا شىعارىلىپ، جويىلادى.
جالپى، وسى جۇمىستارعا 650-دەن استام اسكەري مامان تارتىلادى. جەرگىلىكتى حالىقتىڭ قاۋىپسىزدىگىن قامتاماسىز ەتۋگە ەرەكشە نازار اۋدارىلىپ وتىر.
ارىستاعى جانە جامبىل وبلىسىنىڭ بايزاق اۋدانىنداعى ءوق-دارى قويمالارىندا ورىن العان وقيعالاردىڭ سالدارىن جويۋ جۇمىستارى بيىلعى قاراشا ايىنىڭ سوڭىنا دەيىن جالعاسادى.