ءماجىلىس دەپۋتاتى نيكيتا شاتالوۆ قازاقستانداعى ينتەرنەت-الاياقتىقتىڭ كوبەيۋىن ونلاين-كرەديتتەردىڭ قولجەتىمدىلىگىمەن بايلانىستىرىپ وتىر. ول پارلامەنتتە سويلەگەن سوزىندە ونلاين-كرەديتتەرگە تىيىم سالۋدى تالاپ ەتكەن ونلاين-پەتيسيانى اتاپ ءوتتى.
الايدا، قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ءابىلقاسىموۆا ونلاين-كرەديت بەرۋگە تىيىم سالۋعا قارسى ەكەنىن ايتتى. ونىڭ پىكىرىنشە، بۇل شەشىم بانكتىك قوسىمشالاردىڭ مۇمكىندىكتەرىن شەكتەيدى.
«بىزگە ونلاين-كرەديت بەرۋگە تىيىم سالۋ تۋرالى ۇسىنىس كەلىپ ءتۇستى. الايدا قازىرگى تاڭدا بارلىق قارجىلىق جانە بانكتىك قىزمەتتەر سيفرلاندىرىلعان، ولاردى ونلاين ارقىلى كورسەتۋ كەڭىنەن قولدانىلادى. بۇل كوپتەگەن قازاقستاندىقتاردىڭ مۇددەلەرىنە اسەر ەتەدى. سوندىقتان، ازاماتتاردىڭ ونلاين قىزمەتتەرگە قولجەتىمدىلىگىن شەكتەمەۋ ءۇشىن، ونلاين-كرەديتتەرگە تىكەلەي تىيىم سالۋ ازىرگە ورىنسىز دەپ سانايمىز. ونىڭ ورنىنا، ونلاين-الاياقتىقپەن كۇرەسۋدىڭ باسقا مەحانيزمدەرىن قاراستىرۋدى ۇسىنامىز»، — دەدى ءابىلقاسىموۆا.
ول تىيىم سالۋ ورنىنا، كرەديت بەرۋ وتىنىشتەرىن تەكسەرۋ مەرزىمىن ۇزارتۋدى ۇسىندى. ۇلتتىق بانك تە ونلاين-كرەديتتەرگە تىيىم سالۋدىڭ ءتيىمدى بولمايتىنىن قولدادى.