جىل سايىن 4 اقپاندا اتاپ وتىلەتىن دۇنيەجۇزىلىك قاتەرلى ىسىككە قارسى كۇرەس كۇنى قارساڭىندا وڭىرلىك كوممۋنيكاسيالار قىزمەتى الاڭىندا قازاقستان رەسپۋبليكاسىنداعى 2025 جىلعى ونكولوگيالىق كومەكتىڭ قورىتىندىسىنا ارنالعان بريفينگ بولىپ ءوتتى، - دەپ حابارلايدى Aqshamnews.kz.
ءىس-شارا بارىسىندا قازاق ونكولوگيا جانە راديولوگيا عىلىمي-زەرتتەۋ ينستيتۋتى باسقارما ءتوراعاسىنىڭ ورىنباسارى ايشا مولداشيەۆا ونكولوگيالىق اۋرۋلاردى ەرتە انىقتاۋ مەن ەمدەۋ سالاسىنداعى جۇيەلى جۇمىستىڭ تۇراقتى ناتيجەلەرىن اتاپ ءوتتى.
ونىڭ ايتۋىنشا، 2025 جىلى ەلىمىزدە سكرينينگتىك باعدارلامالاردى كەڭەيتىپ، اۋرۋدى ەرتە انىقتاۋ كورسەتكىشى ارتقاندىقتان جاعداي ءبىرشاما جاقسارىپ قالعان. دياگنوستيكانىڭ ساپاسى جاقسارىپ، دارىگەرلىك كومەكتىڭ تيىمدىلىلىگى ەسەلەنگەندىكتەن بارلىق وڭىردە سىرقاتتانعانداردىڭ سانى دا ەداۋىر ءوسىپتى.
«ءقازىر اۋرۋدى انىقتاۋ دەڭگەيى عانا ءوسىپ قانا قويعان جوق، ونكولوگيالىق اۋرۋلاردى ەرتە انىقتاۋعا باعىتتالعان جۇيەلى جۇمىستىڭ دا ارقاسى بۇل. بۇل ەمدەۋدى ۋاقتىلى باستاۋعا مۇمكىندىك بەرىپ، پاسيەنتتەردىڭ ۇزاق ءارى ساپالى ءومىر ءسۇرۋ مۇمكىندىگىن ەداۋىر ارتتىرادى»، - دەدى ايشا مولداشيەۆا.
جالپى ونكولوگيالىق اۋرۋ بويىنشا ەپيدەميولوگيالىق جاعداي تۇراقتى بولىپ قالىپ وتىر. قازاقستاندا ءقازىر 246 مىڭنان استام ناۋقاس بار، بۇل وتكەن جىلمەن سالىستىرعاندا 6،6 پايىزعا كوپ. بىلتىر 43 مىڭنان استام جاڭا ناۋقاس انىقتالدى، ولاردىڭ جارتىسىنان كوبى العاش رەت دياگنوز قويىلعان ەڭبەككە قابىلەتتى جاستاعى ازاماتتار. اۋرۋشاڭدىق قۇرىلىمىندا ءسۇت بەزى وبىرى، كولورەكتالدىق وبىر مەن وكپە وبىرى الدىنعى ورىنداردى الىپ وتىر، بۇل وتكەن جىلداردىڭ كورسەتكىشتەرىنە سايكەس كەلەدى.
بريفينگ بارىسىندا ونكولوگيالىق قىزمەتتىڭ كادرلىق الەۋەتىن نىعايتۋ ماسەلەسىنە دە ەرەكشە نازار اۋدارىلدى. سپيكەردىڭ ايتۋىنشا، كادرمەن قامتاماسىز ەتۋ جۇيەنىڭ تۇراقتىلىعىنا، پاسيەنتتەرگە كورسەتىلەتىن مەديسينالىق كومەكتىڭ قولجەتىمدىلىگى مەن ساپاسىنا تىكەلەي اسەر ەتەدى.
قازىرگى ۋاقىتتا جۇيەدە ونكولوگيالىق بەيىندەگى 1،7 مىڭنان استام مامان ەڭبەك ەتىپ جاتىر. دارىگەر تاپشىلىعىن كەزەڭ-كەزەڭىمەن ازايتۋ ماقساتىندا رەزيدەنتۋرا ارقىلى كادرلاردى جۇيەلى دايارلاۋ مەن وڭىرلىك قاجەتتىلىكتى ەسكەرە وتىرىپ بىلىكتىلىكتى ارتتىرۋ باعدارلامالارى ىسكە اسا باستادى. عىلىمي ۇيىمداردىڭ بازاسىندا مامانداردى وقىتۋ مەن قايتا دايارلاۋ ارقىلى ونكولوگيالىق ورتالىقتارعا ارنالعان تۇراقتى كادرلىق قور دا قالىپتاسىپ جاتىر.
«ءبىز رەزيدەنتۋرادان باستاپ دارىگەرلەردى، ورتا مەديسينالىق پەرسونالدى، پسيحولوگتار مەن الەۋمەتتىك قىزمەتكەرلەردى مۋلتيديسيپلينارلىق وقىتۋعا دەيىن كادرلاردى دايارلاۋ مەن بىلىكتىلىگىن ارتتىرۋدىڭ ۇزدىكسىز جۇيەسىن قالىپتاستىرىپ جاتىرمىز. بۇل ونكولوگيالىق كومەكتىڭ ساپاسىن كەزەڭ-كەزەڭىمەن ارتتىرىپ، ونىڭ وڭىرلەردە قولجەتىمدى بولۋىن قامتاماسىز ەتەدى»، - دەپ قورىتىندىلادى ايشا مولداشيەۆا.