دۇنيەجۇزىلىك قاتەرلى ىسىك كۇنى الدىن الۋ، تۇراقتى تەكسەرىلۋ جانە دەر كەزىندە ەم قابىلداۋدىڭ ماڭىزىن تاعى ءبىر ەسكە سالادى، - دەپ حابارلايدى Aqshamnews.kz.
بۇگىندە الماتى ونكولوگيالىق ورتالىعى ەرتە دياگنوستيكاعا، از ءينۆازيۆتى تەحنولوگياعا جانە مەديسينالىق كومەكتىڭ دالدىگى مەن قاۋىپسىزدىگىن ارتتىراتىن سيفرلىق شەشىمدەرگە باسىمدىق بەرىپ وتىر. بۇل تۋرالى الماتى قالالىق دەنساۋلىق ساقتاۋ باسقارماسىنىڭ وكىلدەرى ايتتى.
2025 جىل ورتالىق ءۇشىن تەحنولوگيالىق جاڭعىرۋ مەن تۇراقتى دامۋ كەزەڭى بولدى. دياگنوستيكالىق جانە ەمدەۋ مۇمكىندىكتەرى كەڭەيتىلىپ، زاماناۋي جابدىقتار ەنگىزىلدى، پاسيەنتتەردى قامتۋ اۋقىمى ارتتى.
ءبىر جىل ىشىندە ورتالىقتا 57 مىڭنان استام كت جانە مرت زەرتتەۋى، 7،5 مىڭعا جۋىق ەندوسكوپيالىق تەكسەرۋ، 13 مىڭنان استام يممۋنوگيستوحيميالىق تالداۋ جۇرگىزىلدى. مۇنداي كولەم ءدال دياگنوز قويۋعا جانە ءار ناۋقاسقا جەكە ەم تاكتيكاسىن تاڭداۋعا مۇمكىندىك بەرەدى.
ماڭىزدى تەحنولوگيالىق جاڭالىقتاردىڭ ءبىرى Kiro Robotics كومپانياسىنىڭ KiroOncology روبوتتاندىرىلعان حيميوپرەپارات دايىنداۋ جۇيەسىنىڭ ەنگىزىلۋى. الماتى بۇل شەشىمدى قولدانعان ەلدەگى العاشقى قالا اتاندى. روبوت ءدارىنىڭ دوزاسىن ءدال ەسەپتەپ، پرەپاراتتاردى سايكەستەندىرىپ، ەمنىڭ ءار كەزەڭىن اۆتوماتتى باقىلاۋعا الادى. بۇل ادامي قاتەلىكتى ازايتىپ، پاسيەنتتەر مەن مەديسينا قىزمەتكەرلەرى ءۇشىن قاۋىپسىزدىكتى ارتتىرادى.
سيفرلىق تەحنولوگيا دياگنوستيكادا دا كەڭىنەن قولدانىلادى. ساراپتامالىق دەڭگەيدەگى ۋلترادىبىستىق اپپاراتتار جاساندى ينتەللەكتپەن بىرىكتىرىلگەن. جۇيە كەسكىندەردى ناقتى ۋاقىت رەجيمىندە تالداپ، تىندەردىڭ قۇرىلىمىن، تىعىزدىعىن جانە زاقىم وشاعىنىڭ شەكاراسىن باعالايدى. قاجەت بولعان جاعدايدا دارىگەرگە قوسىمشا نازار اۋدارۋدى قاجەت ەتەتىن ايماقتاردى كورسەتەدى. بۇل ەرتە كەزەڭدەگى پاتولوگيانى انىقتاۋعا مۇمكىندىك بەرەدى.
اتالعان تەحنولوگيا ءسۇت جانە قالقانشا بەزدەرىن تەكسەرۋدە قولدانىلادى، ال باۋىر اۋرۋلارىن دياگنوستيكالاۋعا كەزەڭ-كەزەڭىمەن ەنگىزىلىپ جاتىر. مىسالى، مايلى گەپاتوزدى انىقتاۋدا جۇيە وزگەرىستەردى تىركەپ قانا قويماي، ساندىق كورسەتكىشتەردى دە ۇسىنادى. بۇل زاقىم دەڭگەيىن وبەكتيۆتى باعالاپ، ناۋقاس جاعدايىنىڭ ديناميكاسىن باقىلاۋعا جول اشادى.
جاساندى ينتەللەكت الگوريتمدەرىن جەتىلدىرۋ ءۇشىن مەديسينالىق كەسكىندەردىڭ اۋقىمدى دەرەكقورى جاسالىپ جاتىر. وڭتۇستىك كورەيا ماماندارىمەن بىرلەسىپ، مىڭداعان ۋلترادىبىستىق سۋرەت جينالىپ، تاڭبالانۋدا. وقىتۋ اياقتالعاننان كەيىن جۇيە حالىقارالىق ستاندارتتارعا سايكەس كلينيكالىق سىناقتان وتەدى. جوعارى دالدىككە قول جەتكىزۋ ءۇشىن كەمىندە 10 مىڭ زەرتتەۋ قاجەت.
وتكەن جىلى وسى تەحنولوگيانىڭ كومەگىمەن 6 مىڭنان استام ءسۇت بەزى، 100-دەن استام قالقانشا بەزى تەكسەرىلدى. ءسۇت بەزى قاتەرلى ىسىگىنىڭ 128 جاعدايى، 5100 قاتەرسىز وزگەرىس، سونداي-اق قالقانشا بەزى قاتەرلى ىسىگىنىڭ 12 جاعدايى انىقتالدى.
ەمدەۋ باعىتتارى دا ايتارلىقتاي كەڭەيدى. جىل ىشىندە 27 مىڭنان استام پاسيەنت مامانداندىرىلعان كومەك الدى. 3 مىڭنان استام وتا جاسالىپ، ونىڭ 53،2%-ى از ءينۆازيۆتى تاسىلمەن ورىندالدى. مۇنداي ادىستەر جاراقاتتى ازايتىپ، اۋرۋحانادا جاتۋ مەرزىمىن قىسقارتادى جانە قالپىنا كەلۋدى جەدەلدەتەدى. از ءينۆازيۆتى حيرۋرگيا وكپە، ەندومەتريا، بۇيرەك، بۇيرەك ءۇستى بەزدەرى، قۋىقاستى بەزى مەن قۋىق ىسىكتەرىندە بەلسەندى قولدانىلادى.
23 مىڭعا جۋىق پاسيەنت حيميوتەراپيا الدى، مىڭداعان ناۋقاس امبۋلاتوريالىق دارىمەن قامتىلدى. مىڭنان استام ادام ساۋلەلىك تەراپيادان ءوتتى. رەنتگەنولوگيالىق بولىمشەدە ىسىككە ءدال اسەر ەتىپ، ساۋ تىندەردى بارىنشا قورعاۋعا مۇمكىندىك بەرەتىن ExacTrac Dynamic ستەرەوتاكتيكالىق تەحنولوگياسى ەنگىزىلدى.
ەرتە دياگنوستيكا – باستى باسىمدىقتاردىڭ ءبىرى. ورتالىقتا قاتەرلى ىسىكتەردى باستاپقى ساتىسىندا انىقتاۋ كورسەتكىشى رەسپۋبليكا بويىنشا ەڭ جوعارى دەڭگەيدىڭ قاتارىندا. بۇل ەمدەۋدى دەر كەزىندە باستاپ، ءولىم-جىتىمدى ازايتۋعا ىقپال ەتەدى.
جاساندى ينتەللەكت، روبوتتاندىرۋ جانە زاماناۋي جابدىقتار ونكولوگيالىق كومەكتىڭ جاڭا مودەلىن قالىپتاستىرىپ كەلەدى. ول ءدال، ءقاۋىپسىز جانە پاسيەنتكە باعىتتالعان مەديسينالىق قىزمەت. بۇگىندە مۇنداي شەشىمدەر قاتەرلى ىسىكپەن كۇرەستە شەشۋشى ءرول اتقارادى.